ҰРЛЫҚ ЖАСАҒАНДАРДЫ ЖЕДЕЛ ҰСТАДЫ

Карантиндік шектеулер кезінде көп жерлерде алаяқтық жасау, ұрлық-қарлық жасау сияқты оқиғалар етек алуда. Соған орай Шымкент қалалық полиция Департаментінің қызметкерлері жұмыстарын ширатып, азаматтардың қауіпсіздігі мен тыныштығын сақтауға, оларға қарсы құқық бұзушылықтарға жол бермеуге күш салуда.
2021 жылдың 10-тамызында Әл-Фараби АПБ-на Шымкент қаласының тұрғыны арызданған. Ол өз арызында, белгісіз тұлға үйінде тұрған 20.000 теңге тұратын ұялы телефонын, 6.000 теңге тұратын дыбыс зорайтқышын, 7.000 теңге тұратын шаш кептіргішін және 40.000 теңге тұратын киім-кешектерін ұрлап кеткенін жазып көрсеткен.
Әл-Фараби АПБ Криминалдық полиция бөлімінің қызметкерлерімен жедел-іздестіру іс шараларын жүргізу барысында Түркістан облысының тұрғыны анықталып, тиісті орынға жеткізілді. Ұсталған азаматтың басқа да қылмыстарға қатыстылығы анықталуда. Тексеру амалдары жүргізілуде.
Ал қаланың Қаратау ауданының полицейлері велосипед ұрлаған азаматты тәулік ішінде ұстады. Қаратау ауданының Полиция басқармасына «102» арқылы жергілікті тұрғын арызданған. Ол өз арызында, сыртқы қоршауы жоқ тұрғын жайының ауласында тұрған құны 87.000 теңгелік велосипедін белгісіз тұлға жасырын түрде ұрлап кеткенін жазып көрсеткен.
Аталған жайт бойынша, Қаратау АПБ криминалдық полиция бөлімі қызметкерлерімен жедел-іздестіру іс-шарасын жүргізу барысында жергілікті азамат анықталып, тиісті басқармаға жеткізілді.
Осы орайда, Шымкент қаласының полицейлері тұрғындарға жеке мүлкіне сақ болуға шақырады. Егер сіз ұрлықтың құрбаны немесе куәгері болсаңыз, тез арада «102» нөміріне хабарласыңыз. Сіздің берген ақпаратыңыз, қылмыстың тез арада ашылуына өз септігін тигізетінін ескеріңіз.