Осы бір әдемі әуен жүрекке соншалықты жылы тиеді. Иә, шын мәнінде де солай. Әуелден жетімін жылатпаған, жесірін қаңғыртпаған қазақ қоғамы үшін бұл қағиданың құндылығы да осында болса керек. Тастанды бала дегенді білмеген текті халық кешегі аумалы-төкпелі заманда да бала тәрбиесін назардан тыс қалдырып көрген емес.
Жалпы, адам өз өмірінің қожайыны дейтін болсақ, бақытты болу да әр адамның өзіне байланысты болып шығады. Яғни тәрбиесіне, әрекетіне қарай адамның тағдыры қалыптасады. Себебі, адам – өз өмірінің суретшісі. Соның бір бөлшегі балалық шақ деп аталады.
Адам баласы әр кезеңнің өзіне лайық бақыты болатынын сезіне бермейді. Мысалы, ең бірінші адам болып жаратылудың өзі бақыт десек, мұнымызға ешкім қарсы уәж айта қоймас. Сол сияқты ата-ана, туыс-бауыр, дос-жаранның ортасында жүрудің де өзі зор бақыт. Тәуелсіз елде тұрып жатқанымыздың өзі түсінген адамға үлкен бақыт болып саналады. Ал, балалық шақтың бақыты жайлы көп нәрсе айтуға болады. Әр адамға өзінің балалық шағы өміріндегі ең керемет кезеңі екенін де ескере жүргеніміз жөн.
Елімізде әрбір бала бақытты болуға лайық. Баланың бақытты болуының негізгі шарттарының бірі мектеп қабырғасында өз қатарластарынан қалмай білім алуы деп білеміз. Ендеше, сол бақытты бағалап, уақытты тиімді пайдаланып, бүгінгі бақытымызды ертеңгі жақсы күндерімізге жалғау да өзіміздің қолымызда екенін естен шығармайық.
Рас, кейбір отбасыларда түрлі келеңсіздіктер орын алып жатады. Ондайда мойымай, барынша тығырықтан шығатын жолдарды қарастырған жөн. Ол үшін проблеманы іште сақтамай, ең жанашыр адамдарыңмен сырласып, ақыл-кеңес сұраудың еш айыбы жоқ. Бұлттан кейін жарқырап күн шығатыны сияқты, қиын сәттердің де артында жақсылығы болатынын естен шығармайық. Иә, өмір болған соң түрлі қиындықтар кездеспей тұрмайды. Бірақ, ол қиындықтардың уақытша қиындықтар екендігіне сенсеңіз, оның соңы міндетті түрде жақсы болады.
Кейде үлкендердің өзара түсінісе алмауының кесірі жас балаларға тиіп жатады. Соның кесірінен бақытты балалық шақтың дәмін тата алмай, зорлық-зомбылық көріп жүргендер де кездеседі. Бірақ, оларды ондай қиын жағдайлардан алып шығу үшін, тығырықтан шығатын жол тауып беру үшін қоғамда түрлі әрекеттер қолға алынады. Елімізде зорлық-зомбылыққа байланысты көптеген іс-шаралар өткізіліп тұрады. Біздің мектебіміз де сондай іс-шаралардан қалыс қалмай, бастауыш сынып оқушылары арасында «Өмірді өзгерте аламыз», «Зорлық-зомбылықсыз өмір сүреміз», «Қатігездікке жол жоқ, мейірімділікке бар» атты тақырыптарында психолог мамандарымыз түрлі іс-шаралар, байқаулар өткізіп келеді. Мектебіміздің оқушылары мен ұстаздар қауымы аталған іс-шараларға бір кісідей қатысып, 9-11-сынып оқушылары «Зорлық-зомбылықсыз өмірді қалай құрамыз?» деген тақырыпта шығармалар жазып, өзара бақ сынасып жататынын да айта кетейік. Сонымен бірге мектептің педагогикалық ұжымы да «Бақытты балалық шақты қалаймыз», «Балалар саудасы – қоғамның өзекті мәселесі» тақырыптарын негізге ала отырып, «дөңгелек үстел» мәжілістерін ұйымдастырды. Мұндай іс-шаралардың қоғамға тигізер пайдасы зор. Алдағы уақытта да жас жеткіншектеріміз алаңсыз білім алуы үшін, балаларымыздың балалық шағы мейлінше алаңсыз өтуі үшін бар күш-жігерімізбен жұмыс істейміз.
Қ.ӨМІРӘЛИЕВ,
Жеңістің 50 жылдығы атындағы №55 мектептің директоры.
Жетісай ауданы.