Жасыратыны жоқ, соңғы кезде мектеп оқушыларының бір-біріне қысым көрсетуі, зорлық-зомбылық, әлімжеттік жасауы сияқты жағымсыз әрекеттер жиі көрініс бере бастады.
Жақында Мақтаарал ауданында басқа мектептен ауысып келген 7-сынып оқушысын екі сыныптасы ұрып-соғып, мұны үшіншісі телефонға түсіріп, «Тик-Токқа» жүктеп жіберген. Балалардың қатыгездігіне, оны мақтан етіп елге жария етуден қымсынып, ұялмағанына қайран қалдық. Өздерінің ерсі қылықтарын әлеуметтік желіге салуды «сән» көрген оқушылардың бұл тірлігін ата-аналары мектепке жиналысқа шақырғанда бір-ақ білген. Балаларының тәртібі мен тәрбиесіне бейтарап, салғырт қарайтын әке-шешесінің бұл қылығына не деуге болады?
Мектепте айында, жылында бір болатын бала тәрбиесіне қатысты жиналысқа барудан қашқақтап, лажы болса бармауға тырысатын ата-аналар да аз емес. Олар баланың оқуы мен тәртібіне мектеп жауапты, сол үшін жалақы алады деп, бәрін мектеп пен мұғалімге жүктейтіні өтірік емес қой.
Уақытының көп бөлігін смартфонға үңілумен өткізетін балалар әлеуметтік желіден не көріп жүр, одан өзіне пайдалы нәрсе ала ма? Осы мәселе әрбір ата-ананы ойландыруы тиіс. Себебі қазір жас ұрпақ әлеуметтік желі арқылы тәрбиеленіп жатыр. Күн сайын балаға дұрыс бағыт-бағдар беріп, жол көрсетіп отырмасақ, мұның соңы жақсылыққа апармайтынын ескеруіміз керек. Күні ертең ұл-қызыңыз әлдеқандай жамандыққа ұрынып қалса, бұған ең алдымен ата-анасы, туыстары кінәлі болатынын ұмытпайық.
Жалпы, мектеп оқушылары арасындағы тәрбиені мықтап қолға алмаса болмайды. Тәрбиені мектеп ата-аналарға, ата-аналар мектепке сілтеп қоя салуға жол бермеу керек. Әсіресе жасөспірімдердің қолдарындағы телефонға мұқият болуымыз керек. Өйткені, жақсы да, жаман да осы құрылғы арқылы келіп жатқаны жасырын емес. Ата-аналар балаларының қолындағы телефондарға да назар аударып, олардың бос уақыттарында немен айналысатынын да бақылап отырса деген тілек бар.
Н.ТҰРҒАНБЕКОВА,
ата-ана. Мақтаарал ауданы.