Бүгінгі қоғамда парақорлық пен жемқолық араласпаған сала қалмаған шығар?! Біздің түсінікте параны тек шенеуніктер алып, тек солар жазаланады. Ал, пара берудің қылмыс, берушіге де заң алдында жаза бар екенін былайғы жұрт ескере бермейді.
Сыбайлас жемқорлық мемлекеттің әлеуметтік-экономикалық тұрғыдан дамуына кесірін тигізеді. Елімізде жемқорлықпен күрес шаралары жүйелі жүріп жатыр дегенмен, қылмыстың бұл түрі азаймай тұр. Мемлекет бюджетін мақсатсыз пайдалану, қызмет бабын жеке бас пайдасына жарату, жұмысқа қабылдау барысында пара талап ету, тексеріс мекемелерінің келуіне орай қаржы жинау секілді сыбайлас жемқорлық тәуекелдері қоғамда жиі ұшырасып келеді. Бұл жайлы Мемлекет басшысы Қасым-Жомарт Тоқаев та ашық айтып, сыбайлас жемқорлықпен күресті күшейтуді тапсырып келеді. Заң үстемдігін орнатып, нағыз құқықтық мемлекет құру үшін, ең алдымен, жемқорлыққа жол бермеу керек дегенді де айтты Президент.
Бүгінде қай жерде ақша көп, сол жерде парақорлықтың исі шығады. Елімізде көбіне ауыл шаруашылығы, құрылыс, білім беру, коммуналдық сала, денсаулық сақтау салаларында сыбайлас жемқорлық фактілері көп тіркеледі. Бір ғана агроөнеркәсіп кешенінің айналасында дау-дамай, айғай-шу басылар емес. Нақтыласақ, ауыл шаруашылығындағы субсидияларға байланысты жемқорлық деректердің көп анықталатыны бәрімізге жасырын емес.
Жемқорлық фактілерінің орын алуына негізінен пара алушы ғана емес, пара беруші де жауапты. Алайда, олар пара беріп, қылмыс жасап жүргенін сезбейтін де сияқты. Әйтеуір пара алғандар ұсталудай ұсталып-ақ жатыр. Бірақ, одан ығып жатқан ешкім байқалмайды. Жемқорлықтағы екінші тарап, яғни пара беруші әрдайым жазасыз қалып қояды. Мұның өзі сыбайлас жемқорлықты жоюға айтарлықтай кедергі келтіреді. Көп жағдайда пара берушілер де алушыны заңсыз әрекеттер жасауға итермелейді, олар параны да сол үшін береді. Халық арасында пара берушілерге де жауапкершілікті күшейту керек деген пікір жиі айтыла бастады.
Пара алу ғана емес, пара беру де – қылмыс. Сондықтан біреуден бірдеңе аларда, берерде ойланыңыз! Сотталып, темір тордың арғы жағынан бір-ақ шықпаңыз!
Т.Сейітханқызы.