Шымкентте триатлоннан Қазақстан Республикасының қысқы чемпионатының ашылу салтанаты өтті. Бұл жарыста ELITE, U23, U19, U17 санаттары бойынша спринт, ал U15 және U13 санаттары бойынша супер-спринт қашықтықтарында спортшылар бақ сынайтын болады.
Ашылу салтанатында Шымкент қаласының дене шынықтыру және спорт басқармасы басшысының орынбасары Ермек Дәрменов жарыстың маңыздылығына тоқталды. Ол өз сөзінде триатлонның спортшыларға төзімділік пен жылдам шешім қабылдау дағдыларын қалыптастыруға көмектесетінін атап өтті.
— Бұл чемпионат – еліміздің ең мықты спортшыларын анықтап қана қоймай, олардың халықаралық деңгейдегі жарыстарға дайындығын пысықтайтын үлкен мүмкіндік. Әрбір қатысушы өз өңірінің намысын қорғап, бар күшін салатынына сенімдімін. Баршаңызға сәттілік!, – деді ол.
Жарыстың бас төрешісі Юрий Гренев спортшыларды чемпионат ережелерімен таныстырып, триатлон жарысының әділ әрі қауіпсіз өтуіне ерекше назар аударылатынын айтты.
— Біз бұл жарысты халықаралық талаптарға сай ұйымдастырып отырмыз. Әрбір спортшы ережеге сай жарысуы керек. Қауіпсіздік – басты талаптардың бірі. Веложарыс кезінде арақашықтықты сақтау, жүзу кезінде белгіленген бағыттан шықпау және жүгіруде рұқсат етілмеген әдістерді қолданбау – әрбір қатысушының міндеті, – деді бас төреші.
Чемпионатқа еліміздің әр өңірінен келген 9 команда, жалпы 148 спортшы қатысуда. Астана, Алматы, Ақмола облысы, Ақтөбе қаласы, Солтүстік Қазақстан облысы, Жамбыл облысы, Қостанай облысы, Түркістан облысы және Шымкент қаласының келген спротшылар жарыс жолында бақ сынады. Жарыс қашықтықтары ресми бекітілген талаптарға сай жоспарланған. Супер-спринт қашықтығында спортшылар 300 метр жүзу, 8 шақырым веложарыс және 2 шақырым. Ал спринт қашықтығында 750 метр жүзу, 20 шақырым веложарыс және 5 шақырым жүгіру сайыстары болмақ.
Чемпионат 29-31 наурыз аралығында өтеді. Ұйымдастырушылардың айтуынша, бұл жарыс жас спортшыларға үлкен тәжірибе жинауға, ал кәсіби атлеттерге өз шеберліктерін шыңдауға мүмкіндік берді.
«Шымкент келбеті»