Қазақстанның түкпір-түкпірінен жиналған жас өнертапқыштар робототехника саласындағы ең ірі жарыстардың бірінде бас қосты. Robopark ЛИГА X додасына Актөбе, Алматы, Сарыағаш, Кентау, Тараз, Астана, Қызылорда, Өскемен қалаларынан келген 110 команда қатысып, өзара мықтыны анықтауда.
Жарыс үш категория бойынша өтті. Robo Kids (6-10 жас) санатында 30 команда алғашқы роботтарын құрастырып, техникалық білімдерін көрсетсе, Robo Junior (10-16 жас) санатындағы 20 команда шығармашылық ойлау мен инженерлік шеберлікті ұштастырып, өз жобаларын таныстырды. Ал Биатлон (10-16 жас) санатындағы 10 команда спорттық жылдамдық пен логикалық ойлауды қажет ететін ерекше сайыста бақ сынады.
Байқаудың әділ әрі жоғары деңгейде өтуін халықаралық сарапшылар мен тәжірибелі төрешілер қадағалайды. Ұйымдастырушылардың айтуынша, жарыстың басты мақсаты – жастардың ғылым мен технологияға қызығушылығын арттырып, оларды инновацияға бейім маман ретінде тәрбиелеу.
— Біз Қазақстанның түкпір-түкпірінен жиналған дарынды жастарды бір сахнада тоғыстырып, олардың өз білімдері мен дағдыларын көрсетуіне мүмкіндік бергенімізге қуаныштымыз. Бұл жарыс – тек бәсеке ғана емес, инновация мен ынтымақтастықтың мерекесі, – дейді Robopark мектебінің директоры Абзал Әлібеков.
Robopark ЛИГА X – Қазақстандағы жас инженерлер мен өнертапқыштардың дамуына серпін беретін маңызды алаң. Бұл жарыста жеңімпаз атану – үлкен жетістік, ал қатысу – болашаққа жасалған алғашқы қадам.