Шымкент қаласының жұмыспен қамту және әлеуметтік қорғау басқармасына қарасты «№4 арнаулы әлеуметтік қызметтер көрсету орталығы» коммуналдық мемлекеттік мекемесі мүгедектігі бар азаматтарға кешенді әрі сапалы әлеуметтік қызмет көрсетіп келеді.
Орталық Шымкент қаласы, Әл-Фараби ауданы, Жангелдин көшесі, 13А мекенжайында орналасқан. Мекеме 70 орынға есептелген және 18 жастан асқан I–II топтағы мүгедектігі бар азаматтарға жартылай стационарлық режимде қызмет көрсетуге бағытталған. Қызмет алушылар жұмыс күндері әр ауысымда 19 күнге дейін орталық қызметін пайдалана алады.
Мұнда келушілер күніне үш мезгіл ыстық тамақпен — таңғы ас, түскі ас және түстен кейінгі аспен толық қамтамасыз етіледі. Бұл олардың денсаулығын сақтауға және оңалту үдерісін тиімді жүргізуге мүмкіндік береді.
Орталықта әлеуметтік қолдаудың жеті негізгі бағыты бойынша қызметтер көрсетіледі. Атап айтқанда, әлеуметтік-тұрмыстық, әлеуметтік-медициналық, әлеуметтік-психологиялық, әлеуметтік-еңбек, әлеуметтік-мәдени, әлеуметтік-құқықтық және әлеуметтік-экономикалық қызметтер жүйелі түрде ұйымдастырылған.
Медициналық қызмет көрсетуге ерекше басымдық берілген. Қызмет алушыларға заманауи физиотерапиялық ем-шаралар ұсынылады. Олардың қатарында магнитотерапия, «Биоптрон» аппаратымен емдеу, лазеротерапия, электрофорез, емдік массаж, ультракүлгін сәулемен емдеу (УФО), қол саусақтарының қозғалысын қалпына келтіруге арналған робот қолғап, емдік дене шынықтыру, парафинмен емдеу және тұзды ванналар бар.
Орталықтың негізгі мақсаты — қызмет алушылардың денсаулығын нығайту, әлеуметтік бейімделуін арттыру, өмір сүру сапасын жақсарту және олардың қоғам өміріне белсенді араласуына жағдай жасау. Осы бағытта орталық ұжымы жүйелі жұмыс жүргізіп, әлеуметтік қолдаудың тиімді үлгісін қалыптастырып отыр.
