Шымкент қаласында қалалық прокуратураның бастамасымен «Болашақпен диалог» атты ауқымды жоба бастау алды. «Заң мен тәртіп» қағидатын ілгерілету аясында жүзеге асып жатқан бастаманың негізгі мақсаты – «жеңіл ақша» туралы қалыптасқан жалған түсініктерді жойып, жас ұрпақтың бойында адал еңбектің құндылықтарын қалыптастыру.
Жобаның алғашқы спикері – әлеуметтік желілерде 5,2 миллионнан астам аудиториясы бар танымал блогер Нұрдаулет Бектұрсын болды.
Жобаның алғашқы кездесуі М. Сапарбаев атындағы Орталық Азия инновациялық университетінде өтті. Іс-шара форматы дәстүрлі дәрістерден өзгеше – «тең-теңімен» қағидатына негізделген ашық диалогпен өрбіді. Мұнда 35 жасқа дейінгі спикерлер өздерінің өмірлік тәжірибесімен бөлісті.
Кездесудің бастамашысы әрі модераторы, Шымкент қаласы прокурорының көмекшісі Дінислам Әлжан мұндай форматтың маңыздылығына тоқталды.
«Жастар арасында жетістікке оңай жетуге болады деген иллюзия жиі кездеседі. Біз табысты адамдардың жетістікке жету жолындағы шынайы еңбегін көрсеткіміз келеді. Әлеуметтік желілерде көбіне тек нәтиже – әдемі өмір көрінеді, ал оның артында ұзақ жылдық еңбек жатыр. Басты мақсатымыз – жетістікке тек «Заң мен тәртіп» қағидатын қатаң сақтай отырып қол жеткізуге болатынын түсіндіру. Заңның бір күнге болсын сақталмауы қоғамда бейберекетсіздік пен қауіпсіздіктің әлсіреуіне әкеледі. Жоба жүйелі түрде жалғасады – кездесулер 2026 жылдың соңына дейін екі апта сайын өткізіледі», – деді ол.
Өз кезегінде Нұрдаулет Бектұрсын студенттермен ашық әңгіме жүргізіп, Кентау қаласындағы қарапайым фельдшерден миллиондаған аудиториясы бар блогерге дейінгі жолының оңай болмағанын айтып, «жеңіл табыс» туралы түсініктерден сақ болуға шақырды.
«Instagram-да көрсетілетін жеңіл ақшаға сенбеңіздер. Интернет – құрал ғана: одан пайдалыны да, зияндыны да алуға болады. Мен де қарапайым студент кезімде қаржылық қиындықтарды бастан өткердім. Уақыт өте келе бір нәрсені түсіндім. Шынайы табыс – адал еңбекпен келуі қажет. Патриот болу – ұрандату емес, өз орныңды тауып, мамандық игеріп, елге пайда келтіру. Заманауи технологияларды меңгеріңіздер, бірақ әрдайым есте сақтаңыздар: тәртіп пен заңды сақтау – барлық жетістіктің негізі», – деді ол.
Кездесу барысында прокуратура жасанды интеллект көмегімен әзірлеген «Заңсыз бір күн» тақырыбындағы дайындалған бейнеролик көпшіліктің ерекше қызығушылығын тудырды. Аталған бейнежазба небәрі бес күн ішінде Instagram желісінде миллион қаралым жинаған.
Айта кетейік, бүгінгң кездесуге 150-ден астам студент қатысты. «Болашақпен диалог» жобасы алдағы уақытта заңды сақтай отырып жетістікке жетуге бағыттайтын ұғымдарын жастар үшін нақты маңызды алаң болмақ.