М.Әуезов атындағы Оңтүстік Қазақстан университеті мен Қазақстан Республикасы Мемлекеттік қызмет істері агенттігінің Шымкент қаласы бойынша департаменті сыбайлас жемқорлыққа қарсы мәдениетті қалыптастыру бағытындағы ынтымақтастық туралы меморандумға қол қойды.
Іс-шараға екі тараптың басшылық құрамы, Сыбайлас жемқорлықтың алдын алу басқармасының қызметкерлері және университеттің «Заң» факультетінің профессор-оқытушылары қатысты.
Университеттің бірінші проректоры Құрманғалы Сарықұлов сыбайлас жемқорлыққа қарсы жұмыстардың жүйелі түрде жүргізіліп жатқанын атап өтіп, меморандумның бұл бағыттағы жұмыстың тиімділігін арттыра түсетінін айтты.
Меморандумның негізгі мақсаты – сыбайлас жемқорлыққа қарсы білім мен мәдениетті қалыптастыру, академиялық адалдық қағидаларын ілгерілету және құқық бұзушылықтардың алдын алу бойынша өзара іс-қимылды күшейту.
Құжат аясында «Сыбайлас жемқорлыққа қарсы мәдениет негіздері» пәнінің мазмұнын жетілдіру, комплаенс-мамандар даярлауға әдістемелік қолдау көрсету, академиялық адалдықты насихаттау, жастар арасында түсіндіру жұмыстарын жүргізу және бірлескен кездесулер мен қонақ дәрістер ұйымдастыру жоспарлануда.
Жиын соңында қатысушылар сыбайлас жемқорлыққа қарсы заңнамадағы өзекті өзгерістер мен толықтыруларды талқылап, бірқатар ұсыныстарын ортаға салды.
Меморандум аясындағы өзара ынтымақтастық білім беру ұйымы мен мемлекеттік орган арасындағы байланысты жаңа деңгейге көтеріп, жастардың құқықтық сауаттылығын арттыруға бағытталған бірлескен жобаларды жүзеге асыруға мүмкіндік береді. Тараптар алдағы уақытта тәжірибелік семинарлар, дөңгелек үстелдер, пікірсайыстар, студенттерге арналған ақпараттық кездесулер мен сараптамалық дәрістер ұйымдастыруды көздеп отыр. Бұл шаралар білім алушылардың заң талаптарын терең меңгеруіне, азаматтық жауапкершілігін нығайтуына және академиялық ортада адалдық қағидаттарын берік ұстануына ықпал етеді.
Сонымен қатар меморандум шеңберінде университеттің профессор-оқытушылар құрамы мен студенттеріне арналған оқыту бағдарламаларын жетілдіру, сыбайлас жемқорлықтың алдын алу бойынша үздік тәжірибелерді енгізу және құқықтық мәдениетті қалыптастыруға бағытталған ғылыми-тәжірибелік бастамаларды қолдау жоспарланған. Мұндай жұмыстар білім беру үдерісінің сапасын арттырып қана қоймай, қоғамда ашықтық, әділдік және заң үстемдігі қағидаттарын нығайтуға да өз үлесін қосады.
Бүгінде академиялық адалдық пен сыбайлас жемқорлыққа қарсы мәдениетті қалыптастыру жоғары оқу орындарының маңызды міндеттерінің бірі болып табылады. Осы бағыттағы жүйелі жұмыстар студенттердің кәсіби және адамгершілік құндылықтарын дамытуға, мемлекеттік қызметке және өзге де салаларға білікті, жауапты әрі адал мамандар даярлауға негіз қалайды. Университет пен Агенттік арасындағы әріптестік осы мақсаттарды іске асыруға бағытталған нақты қадамдардың бірі ретінде бағаланып, алдағы уақытта бірлескен жобалардың аясын кеңейтуге мүмкіндік береді.
