2026 жылғы 12 маусымда М. Әуезов атындағы Оңтүстік Қазақстан университетінің докторанттары мен Халықаралық алмасу және қызмет көрсету орталығының Халықаралық департаменті директорының орынбасары Тони Чжу, сондай-ақ Силезия технологиялық университетінің профессоры, ғылым және ынтымақтастық жөніндегі деканның орынбасары, функционалды наноматериалдар зерттеу тобының жетекшісі Дэвид Янастың қатысуымен кездесу өткізілді.
Кездесу барысында халықаралық индекстелетін журналдарда ғылыми мақалаларды жариялау белсенділігін арттыру, сапалы ғылыми мақала дайындау талаптары, халықаралық ғылыми ынтымақтастықты дамыту және жариялау үдерісін жетілдіру мәселелері талқыланды.
Қатысушылар халықаралық ғылыми қауымдастықпен бірлескен зерттеулер жүргізудің маңыздылығын атап өтіп, мақала дайындау кезінде ғылыми жаңашылдықты, зерттеу нәтижелерінің практикалық маңыздылығын және академиялық жазу талаптарын сақтау қажеттілігіне тоқталды. Сонымен қатар, мақалаларды қарау және жариялау мерзімдерінің ұзақтығына әсер ететін факторлар талданып, жариялау процесін жеделдетудің тиімді жолдары қарастырылды.
Кездесу нәтижесінде докторанттар халықаралық деңгейдегі ғылыми жарияланымдарға қойылатын талаптар жөнінде құнды ақпарат алып, ғылыми-зерттеу жұмыстарын халықаралық ғылыми кеңістікке ілгерілету бойынша тәжірибелік ұсыныстармен танысты.
Халықаралық ғалымдармен өткен бұл кездесу жас зерттеушілердің ғылыми әлеуетін арттыруға, олардың әлемдік ғылыми үрдістермен танысуына және заманауи зерттеу бағыттарын меңгеруіне мүмкіндік берді. Ғалымдар өз тәжірибелерімен бөлісіп, халықаралық ғылыми жобаларға қатысу, шетелдік зерттеу орталықтарымен байланыс орнату және бірлескен еңбектер жариялау бағыттары бойынша өз ұсыныстарын білдірді.
Кездесу барысында докторанттарға ғылыми жұмыстың сапасын арттыруда зерттеу әдістемесін дұрыс таңдау, деректерді талдау, ғылыми нәтижелерді нақты әрі жүйелі түрде ұсыну және халықаралық талаптарға сай академиялық мәтін қалыптастырудың маңыздылығы түсіндірілді. Сонымен қатар ғылыми мақалаларды дайындау барысында зерттеушінің жауапкершілігі, дереккөздермен дұрыс жұмыс істеу және ғылыми этика қағидаларын сақтау мәселелеріне ерекше назар аударылды.
Мұндай кездесулер университеттің халықаралық ғылыми байланыстарын нығайтып қана қоймай, докторанттардың кәсіби дамуына және олардың зерттеу нәтижелерін әлемдік деңгейде танытуына жол ашады. Шетелдік ғалымдармен тәжірибе алмасу арқылы жас зерттеушілер жаңа ғылыми тәсілдерді меңгеріп, өз салаларындағы өзекті мәселелерді шешуге бағытталған тың жобаларды жүзеге асыруға мүмкіндік алады.
М. Әуезов атындағы Оңтүстік Қазақстан университетінде халықаралық ынтымақтастықты дамыту, ғылыми кадрлардың біліктілігін арттыру және білім мен ғылымның жаһандық кеңістігіне ықпалдасу бағытындағы жұмыстар жүйелі түрде жалғасуда. Осындай бастамалар университеттің ғылыми беделін арттырып, отандық зерттеушілердің халықаралық аренадағы белсенділігін күшейтуге ықпал етеді.
