Ұлы ағартушы, педагог Ыбырай Алтынсариннің 185 жылдық мерейтойына арналған танымдық экспедициядан оралған Әуезов университетінің белсенді жастары оқу орнының басшылығымен кездесті.
8 күнге созылған экспедиция барысында жастар Шымкент – Түркістан – Қызылорда – Жезқазған – Ұлытау – Арқалық – Қостанай – Қарабұтақ – Арал – Байқоңыр бағыттары бойынша сапар шегіп, еліміздің тарихи-мәдени орындарымен танысты. Сапардың басты мақсаты – жастардың ел тарихына деген қызығушылығын арттыру, өңірлер арасындағы байланысты нығайту және Ыбырай Алтынсариннің ағартушылық мұрасын кеңінен насихаттау болды.
Экспедиция аясында қатысушылар еліміздің әр өңіріндегі тарихи ескерткіштерді, мәдени нысандарды аралап, олардың тарихымен және тағылымды мұрасымен жақынырақ танысты. Сонымен қатар, жастар жергілікті тұрғындармен, білім беру ұйымдарының өкілдерімен және белсенді жастармен кездесіп, өзара тәжірибе алмасуға мүмкіндік алды. Мұндай кездесулер қатысушылардың таным көкжиегін кеңейтіп, елдің әр өңірінің ерекшеліктерін тереңірек түсінуге жол ашты.
Кездесу барысында Жастар орталығының директоры Ерасыл Анарханұлы экспедицияның нәтижелерімен бөлісіп, жастарға осындай мүмкіндік жасаған университет басшылығына алғысын білдірді. Оның айтуынша, сапар барысында студенттер көптеген тарихи орындарды аралап қана қоймай, туған елдің өткені мен бүгініне қатысты тың мәліметтер алып, өзара ұйымшылдық пен жауапкершілікті нығайтқан. Сондай-ақ мұндай жобалар жастардың азаматтық ұстанымын қалыптастырып, патриоттық рухын арттыруға ықпал ететінін атап өтті.
Өз кезегінде Басқарма Төрағасы – ректордың м.у.а. Ғани Бесбаев жастарды сәтті сапармен құттықтап, мұндай экспедициялардың маңыздылығына тоқталды.
«Қазақстанның әр өңірі – тұнған тарих пен тағылым. Сондықтан жастар тек өз аймағымен шектелмей, еліміздің басқа өңірлерін де танып-білуі керек. Тарихи ескерткіштерді көріп, жаңа орта қалыптастырып, тәжірибе алмасу – мұндай экспедициялардың басты құндылығы. Алдағы уақытта бұл бастаманы дәстүрге айналдырамыз», – деді ол.
Кездесу соңында жастар сапар барысында жинаған естеліктері мен арнайы тартуларын университет басшылығына табыстап, әсерлерімен бөлісті. Экспедицияға қатысушылар бұл сапардың өздері үшін үлкен тәжірибе мен тағылым мектебі болғанын айтып, тарихи орындарды көзбен көрудің елге деген сүйіспеншілікті арттырып, ұлттық құндылықтарды тереңірек түсінуге ықпал еткенін жеткізді. Сонымен қатар, олар алдағы уақытта осындай танымдық жобалардың жалғасын тауып, университет жастарының қатысуымен тұрақты түрде ұйымдастырылатынына сенім білдірді.
