МАҢҒЫСТАУДАҒЫ КӘСІБИ БАҒДАР ЖҰМЫСЫ АЛҒАШҚЫ НӘТИЖЕСІН КӨРСЕТУДЕ

Бүгін университетімізге Жаңаөзен қаласынан келген алғашқы талапкерлердің бірі Нұртас Раушенов анасы Айсұлумен бірге «Дене шынықтыру және спорт мұғалімдерін даярлау» факультетіне оқуға құжаттарын тапсырды. Талапкерді факультет деканы Ахан Демеуов қарсы алып, білім беру бағдарламалары, материалдық-техникалық базасы, спорттық инфрақұрылымы, оқу үдерісі, академиялық мүмкіндіктер мен студенттік өмір туралы жан-жақты ақпарат берді.
Бұл – жуырда Маңғыстау облысында өткен кәсіби бағдар беру жұмыстарының жемісі. Университет өкілдері өңір мектептерінде болып, бітіруші түлектермен, ата-аналармен және педагогтермен кездесулер өткізіп, университеттің білім беру мүмкіндіктері, мемлекеттік гранттар, жатақхана, академиялық ұтқырлық, қос диплом бағдарламалары және түлектерді жұмыспен қамту бағытындағы жұмыстар туралы кеңінен ақпарат берген болатын.
Айта кетерлігі, қазіргі таңда оқу орнында Маңғыстау өңірінен келген 16 студент білім алуда. Олар білім және ғылым, шығармашылық, қоғамдық жұмыстарда белсенділік танытып, университетіміздің мақтанышына айналып келеді. Өзбекәлі Жәнібеков атындағы Оңтүстік Қазақстан педагогикалық университеті – еліміздің түкпір-түкпірінен келген жастарға сапалы білім мен жан-жақты даму мүмкіндігін ұсынушы іргелі оқу орны. Мұнда әрбір талапкердің арманына қанат бітіп, білікті педагог, кәсіби маман болып қалыптасуына барлық жағдай жасалған.
Кәсіби бағдар беру жұмыстары алдағы уақытта да жүйелі түрде жалғасын табады. Университеттің қабылдау комиссиясы талапкерлер мен олардың ата-аналарына білім беру бағдарламаларының ерекшеліктері, оқу шарттары, қабылдау талаптары және студенттерге ұсынылатын әлеуметтік қолдау мүмкіндіктері жөнінде тұрақты түрде кеңес беруді жалғастыруда. Бұл жұмыстар талапкерлердің болашақ мамандығын саналы таңдауына және өз қабілеті мен қызығушылығына сәйкес бағытты айқындауына ықпал етеді.
Университет үшін әрбір талапкердің таңдауы маңызды. Сондықтан оқу орны өңірлермен байланысты нығайтып, мектептермен әріптестікті дамытуға, жастардың сапалы жоғары білім алуына қолайлы жағдай жасауға ерекше мән береді. Маңғыстау облысынан келген талапкерлердің қатары алдағы күндері де артып, кәсіби бағдар беру жұмыстарының нәтижесі жаңа жетістіктермен толыға түседі деп күтілуде. Бұл өз кезегінде өңіраралық білім беру байланысын күшейтіп, елдің әр аймағынан келген дарынды жастардың бір шаңырақ астында білім алып, бәсекеге қабілетті маман болып қалыптасуына мүмкіндік береді.