ӘУЕЗОВ УНИВЕРСИТЕТІНДЕ ГЕОЛОГИЯЛЫҚ БАРЛАУДЫ ЖАҢҒЫРТУДАҒЫ ЖАСАНДЫ ИНТЕЛЛЕКТТІҢ МАҢЫЗЫ ҚАРАСТЫРЫЛДЫ

М.Әуезов атындағы ОҚУ-да «Функционалдық кеңістіктердегі интегралдық операторлар және гармониялық талдау» атты халықаралық ғылыми конференция өтті.
Конференцияда Қазақстан Республикасы Ұлттық инженерлік академиясының жасанды интеллект және цифрлық даму жөніндегі вице-президенті, физика-математика ғылымдарының докторы, әл-Фараби атындағы Қазақ ұлттық университетінің профессоры Н.М. Темірбеков «Геологиялық деректерді өңдеу және кен перспективалы аумақтарды болжау үшін машиналық оқыту әдістері» тақырыбында баяндама жасады.
Спикер геологиялық саланы цифрландыру, жер қойнауы туралы ақпаратты жүйелеу және жасанды интеллект технологияларын геологиялық барлау жұмыстарына енгізудің маңызына тоқталды.
Сондай-ақ BR27100483 ғылыми-техникалық бағдарламасы аясында жасанды интеллект пен Жерді қашықтан зондтау технологияларының көмегімен геологиялық, геофизикалық, геохимиялық және ғарыштық деректерді кешенді талдау арқылы кен перспективалы аумақтарды анықтаудың жаңа тәсілдері таныстырылды.
Зерттеу нәтижесінде Шығыс Қазақстандағы Қалба–Нарым металлогендік аймағында литий минералдануының перспективалы учаскелері анықталып, әзірленген модельдердің жоғары сенімділігі дәлелденді.
Конференция барысында ұсынылған ғылыми нәтижелер жасанды интеллекттің геологиялық барлау жұмыстарын жаңғыртуға, пайдалы қазбаларды іздеу тиімділігін арттыруға және Қазақстанның минералдық-шикізаттық әлеуетін ғылыми тұрғыдан бағалауға кең мүмкіндік беретінін көрсетті.
Конференция аясында ғалымдар мен зерттеушілер қазіргі ғылымдағы пәнаралық ықпалдастықтың маңыздылығына ерекше назар аударды. Математикалық модельдеу, деректерді интеллектуалды өңдеу және цифрлық технологияларды өндіріске енгізу геологиялық зерттеулердің сапасын арттырып қана қоймай, уақыт пен қаржы шығындарын азайтуға мүмкіндік беретіні айтылды. Жасанды интеллект негізінде әзірленген алгоритмдер үлкен көлемдегі деректерді қысқа мерзімде саралап, геологиялық нысандардың перспективалылығын жоғары дәлдікпен бағалауға жол ашады.
Халықаралық ғылыми конференция тәжірибе алмасу мен жаңа ғылыми байланыстар орнатудың маңызды алаңына айналды. Шара барысында ұсынылған зерттеулер ғылым мен өндіріс арасындағы байланысты нығайтып, еліміздің минералдық-шикізаттық қорын тиімді игеруге бағытталған инновациялық шешімдердің маңызын айқындады. Сонымен қатар, жас ғалымдар мен докторанттар жетекші зерттеушілердің баяндамаларымен танысып, өздерінің ғылыми ізденістерін дамытуға қажетті тың ақпарат алды.
М.Әуезов атындағы Оңтүстік Қазақстан университетінде ұйымдастырылған мұндай халықаралық деңгейдегі ғылыми іс-шаралар ғылымның басым бағыттарын дамытуға, заманауи технологияларды білім беру үдерісімен ұштастыруға және халықаралық ғылыми ынтымақтастықты кеңейтуге ықпал етеді. Бұл өз кезегінде университеттің ғылыми әлеуетін арттырып, Қазақстандағы инновациялық зерттеулердің дамуына жаңа серпін береді.