Жақында Қазақстан тұрғындары Құрылтай құрамына кіретін депутаттарды сайлау үшін дауыс бере алады.
1 шілдеден бастап күшіне енген Конституцияға сәйкес, Қазақстан Республикасының Құрылтайы – заң шығару билігін жүзеге асыратын елдің ең жоғары өкілді органы. Ол екі палаталы Парламенттің орнына келеді.
Тарихтағы алғашқы Құрылтай депутаттарының сайлауы 23 тамызда өтеді.
Сайлау учаскелері жергілікті уақыт бойынша таңғы сағат 07:00-ден кешкі 20:00-ге дейін жұмыс істейді. Осы уақыт аралығында кәмелетке толған азаматтар өздері таңдаған партияға дауыс бере алады. Дауыс беру партиялық тізімдер бойынша өтеді. Құрылтай құрамына 145 депутат сайланады, олардың өкілеттік мерзімі – бес жыл.
Биыл саяси партиялардың сайлауға қатысу шарттарына өзгерістер енгізілді. 2023 жылғы парламенттік сайлауда бес және одан көп пайыз дауыс жинаған партиялар сайлау жарнасын төлеуден босатылады. Үш пен бес пайыз аралығында дауыс алған партиялар белгіленген жарнаның 50 пайызын, ал бір мен үш пайыз аралығында дауыс жинағандар 70 пайызын төлейді.
Партиялық тізімдерді тіркеу аяқталғаннан кейін, яғни 23 шілде күні сағат 18:00-де сайлауалды үгіт-насихат кезеңі басталады. Ол 22 тамыз күні сағат 00:00-де аяқталады. Саяси партияны қолдауға немесе оған қарсы дауыс беруге шақыру тек осы кезеңде ғана заңды болып саналады. Белгіленген мерзім басталғанға дейін, сондай-ақ тыныштық күні мен дауыс беру күні үгіт-насихат жүргізуге заңмен тыйым салынған.
2 тамызға дейін жергілікті атқарушы органдар сайлаушылар тізімін учаскелік сайлау комиссияларына тапсыруы тиіс. Ал 7 тамыздан бастап азаматтар өздерінің тізімдегі деректерін тексере алады. Осы күні сырттай дауыс беруге арналған куәліктерді беру де басталады. Олар 22 тамыз күні жергілікті уақыт бойынша сағат 18:00-ге дейін беріледі.