Бүгінгі таңда жоғары білім беру мен ғылым саласындағы халықаралық кооперация — сапалы кадр даярлаудың басты кепілі. Осы орайда М.Әуезов атындағы Оңтүстік Қазақстан зерттеу университеті өзінің халықаралық байланыстарын нығайтып, өңірлік білім беру кеңістігін кеңейтуді белсенді түрде жалғастыруда.
Жақында өңірлік жоғары білімді дамытуға септігін тигізетін маңызды оқиға орын алды. М.Әуезов атындағы ОҚЗУ-дың Өзбекстан Республикасы Шыршық қаласындағы филиалы көршілес мемлекеттің алдыңғы қатарлы жоғары оқу орындарымен бірлескен меморандумдар мен келісімдер түзу жұмыстарын сәтті жүргізді.
2026 жылғы 18 тамыз күні Қоқан мемлекеттік университетінің оқу істері жөніндегі проректоры Базаров Айбек Адилович пен М.Әуезов атындағы ОҚЗУ-дың Шыршық қаласындағы филиалының директоры Айтуреев Мұрат Жарылқасынұлы кездесті. Келіссөздер нәтижесінде тараптар өзара жоғары білікті мамандарды даярлау туралы меморандумға және академиялық ұтқырлық бағдарламасы бойынша ынтымақтастық келісіміне қол қойды.
Бұл құжаттың басты мақсаты — Қазақстан мен Өзбекстан Республикаларының білім саласындағы заңнамалары шеңберінде сапалы кадр даярлауды жолға қою. Қол қойылған келісімдер аясында екі елдің оқу орындары оқу процесіне озық жасанды интеллект технологиялары мен ғылымның соңғы жетістіктерін енгізуді көздеп отыр. Сонымен бірге оқу бағдарламаларын жаңарту және пәндердің оқу-әдістемелік кешендерін заманауи талаптарға сай байыту жоспарланған.
Келісімнің өзекті бағыттарының бірі — екі университет арасындағы академиялық ұтқырлықты дамыту. Бұл студенттер мен оқытушылар арасында тәжірибе алмасуға, оқытудың жаңа әдістемелерімен танысуға және екі елдің білім саласындағы артықшылықтарын бірлесе игеруге кең жол ашады.
Айта кету керек, Қоқан мемлекеттік университеті — Өзбекстан Республикасындағы 100 жылға жуық тарихы бар, 18 мыңнан астам білім алушысы бар алдыңғы қатарлы ірі оқу орындарының бірі. Бұндай іргелі ЖОО-мен серіктестік орнату М.Әуезов атындағы Оңтүстік Қазақстан зерттеу университетінің халықаралық аренадағы беделін арттыра түседі.
Шыршық қаласындағы университет филиалы болашақта Қоқан мемлекеттік университетінің ректоры Ходжаева Дильноза Шавкатовна және М.Әуезов атындағы ОҚЗУ Басқарма төрағасы – ректор Төлеген Мұхтар Әділбекұлының қолдауымен екі жоғары оқу орны арасындағы ынтымақтастықты одан ары күшейтетін болады.
Бұл серіктестік тек екі оқу орнының шеңберінде ғана емес, жалпы өңірлік жоғары білім беру жүйесінің сапасын арттыруға оң ықпал етеді. Бірлескен ресурстар, инновациялық технологиялар мен озық тәжірибе халықаралық білім беру кеңістігіндегі интеграцияны жеделдетіп, студенттер мен жас ғалымдарға жаңа мүмкіндіктер сыйлайды.