Мұхтар Әуезов атындағы Оңтүстік Қазақстан зерттеу университетінің Басқарма төрағасы – ректоры Мұхтар Төлеген №9 оқу ғимаратындағы сабақ үдерісінің ұйымдастырылуымен және материалдық-техникалық базаның жай-күйімен танысты.
Нысанды аралау барысында университет басшысы «Тарих және педагогика» және «Аграрлық» факультеттерінің профессор-оқытушылар құрамымен кездесті. Жүздесуде білім беру сапасы, ғылыми-зерттеу жұмыстары және құрылымдық бөлімдердің даму бағыттары жан-жақты талқыланды.
Бүгінгі таңда оқу ордасы ізденіс жұмыстарын жаңа деңгейге көтеруді және интеллектуалдық әлеуетті тиімді пайдалануды басты басымдық ретінде белгілеп отыр. Жиында жас ғалымдарға қолдау көрсету мәселесіне ерекше екпін берілді.
– Жас зерттеушілердің ізденістеріне қолайлы жағдай жасап, олардың халықаралық жобалар мен гранттық бағдарламаларға қатысуына мүмкіндік беру ортақ міндетіміз. Әр факультет пен ғылыми ұжым өз бағытында жаңа бастамалар көтеріп, ғылымды университет дамуының негізгі қозғаушы күшіне айналдыруы қажет. Біздің мақсатымыз – бәсекеге қабілетті маман даярлау ғана емес, инновацияны алға сүйрейтін заманауи зерттеу университетін қалыптастыру, – деп атап өтті Мұхтар Әділбекұлы.
Жоғары білімнің сапасы зерттеу қызметімен тікелей байланысты. Осы орайда білім беру мен ғылымды өзара сабақтастыра отырып, оқу орнының халықаралық беделін арттыру және нақты нәтижеге бағытталған жобаларды жүзеге асыру басты басымдықтардың бірі. Инновацияға бет бұрған жоғары оқу орны елдің интеллектуалдық әлеуетін арттыруға зор үлес қоспақ.
Сонымен қатар, аграрлық және гуманитарлық бағыттағы мамандықтарды дамыту өңірдің экономикалық және әлеуметтік қажеттіліктерімен тығыз байланыста қарастырылды. Ауыл шаруашылығы саласына заманауи технологияларды енгізу, озық тәжірибелерді өндіріске тарту және агробизнес бағытындағы зерттеулерді күшейту маңызды міндеттердің қатарында тұр. Бұл өз кезегінде өңірдің азық-түлік қауіпсіздігі мен кадрлық әлеуетін арттыруға мол мүмкіндік береді.
Тарих және педагогика факультетінің ғалымдары мен оқытушылары үшін де жаңа міндеттер айқындалды. Ұлттық тарихты терең зерттеу, рухани құндылықтарды жас ұрпаққа дәріптеу және педагогикалық кадрлардың біліктілігін үнемі жетілдіріп отыру басым бағыттардың бірі болып қала бермек. Мұрағат құжаттарымен жұмыс істеу және заманауи цифрлық технологияларды гуманитарлық ғылымдарға енгізу жұмыстары жандандырыла түседі.
Университет басшылығы факультеттердің материалдық-техникалық базасын жаңғырту, зертханалардың әлеуетін арттыру және студенттердің сапалы білім алуына қолайлы орта қалыптастыру бағытындағы жұмыстардың жүйелі түрде жалғасатынын атап өтті. Алдағы уақытта оқу орын жанынан жаңа зерттеу орталықтары мен стартап алаңдарын ашу жоспарланған. Бұл бастамалар жас зерттеушілердің өз идеяларын жүзеге асыруына және коммерцияландыруына жол ашады.
Қорытындылай келгенде, осындай кездесулер мен жүйелі бақылаулар оқу орнының ішкі әлеуетін нығайтып қана қоймай, өңірлік ғылым мен білімнің бәсекеге қабілеттілігін арттыруға айтарлықтай үлес қосады. Университет ұжымы алға қойылған ауқымды мақсаттарды жүзеге асыру жолында бірігіп жұмыс істеп, елдің интеллектуалдық және экономикалық дамуына өз үлесін қосуды жалғастыра бермек.