Президент Қасым-Жомарт Тоқаевтың «Жаңа жағдайдағы Қазақстан: іс-қимыл кезеңі» атты Жолдауында қазақстандықтарды әлемде қалыптасқан саяси-әлеуметтік жағдайда мықты мемлекет болу үшін қоғамдық келісімді, ір істе әділеттілік пен заңдылықты сақтауға деген жауапкершілікке шақырды. Шындығында бәсекеге қабілетті, мықты мемлекет болу үшін ірі, кіші демей әр істе жауапкершілік таныту, заңдылықты сақтау маңызды. Онсыз қоғамдағы келісім де, мемлекеттің әлеуметтік-экономикалық дамуындағы ілгерілеу де болмайды.
Шымкент қаласы Абай ауданы аумағында заңсыз орнатылған жарнамаларды жою мақсатында рейдтік іс-шара ұйымдастырылды. Іс-шараға аудан әкімі аппаратының қызметкерлері және қалалық сәулет, қала құрылысы және жер қатынастары басқармасының қызметкерлері қатысты.
Рейд барысында негізгі көшелердің бірі – Темірлан тас жолы бойындағы заңсыз орнатылған жарнамалар анықталды. Нәтижесінде 15 заңсыз жарнама аудандық кірістер басқармасына тіркеуге жолданып, 10 жарнаманың заңдылығы анықталуда.
Сонымен қатар, рейдтік топ жарнама иелеріне заңсыздық қайталанған жағдайда Қазақстан Республикасының Әкімшілік құқық бұзушылық туралы кодекстің 463-бабы яғни, тиiстi тiркеусiз, рұқсатсыз немесе хабарлама жібермей кәсіпкерлік немесе өзге де қызметпен айналысқан жағдайда әкімшілік шара қолданылатындығы туралы түсіндірме жұмыстарын да жүргізді.
Жарнаманы орнатар алдында қалалық мәдениет басқармасымен келісіліп, кейін орнатқан мекенжайы, қанша уақыт тұратыны жайлы қалалық сәулет, қала құрылысы және жер қатынастары басқармасына хабар берілу керек. Әрбір жарнама кірістер департаментіне салық төлеу мақсатында тіркеледі.