Қазақстан Республикасының Тәуелсіздігіне биыл отыз жыл толуда. Бодандық кезеңде бордай тозған қазақ тілі осы уақыт ішінде әлі өзінің мемлекеттік тіл ретіндегі функцияларын толық және дұрыс атқара алмауда. Мемлекет басшысы атап айтқандай Мемлекеттік тілді жазалау, саяси науқан түрінде дабырлатпай күнделікті жұмыс ретінде үздіксіз түсіндіре отырып мәртебесіне көтеру керек. Шымкент қаласының әкімдігі бұл мәселеде байыппен тыңғылықты жұмыс жасауда.
«Қазақстан Республикасындағы Тіл туралы» Заңына сәйкес, Шымкент қаласының Еңбекші ауданы аумағындағы Т.Рысқұлов көшесінде орналасқан кәсіпкерлік нысандарының қасбеттеріндегі атаулары орфографиялық дұрыс жазылуы жөнінде түсіндіру жұмыстары жүргізілді.
Көрнекті ақпараттың барлық мәтіні мынадай ретпен жазылуы тиіс: мемлекеттік тілде — сол жағына немесе жоғарғы жағына, орыс тілінде оң жағына немесе төменгі жағына орналасады, бірдей өлшемдегі әріптермен жазылады. Қажеттігіне қарай көрнекті ақпараттың мәтіндері қосымша басқа да тілдерге аударылуы мүмкін. Бұл жағдайда қаріп өлшемі нормативтік құқықтық актілерде белгіленген талаптардан аспауға тиіс.
Аталған талаптардың сақталмауы “Әкімшілік құқық бұзушылық туралы” ҚР Кодексінің 75-бабына сәйкес, әкімшілік жауапкершілік қарастырылған.
Осыған орай, кәсіпкерлік нысан иелеріне көрнекті ақпарат мәтінін қолданыстағы заңнама талаптарына сәйкестендіру туралы түсіндіру жұмыстары атқарылды. Аталған жұмыстар алдағы уақытта өз жалғасын табатын болады.