Еліміздегі үшінші мегаполис – Шымкент қаласында әкімдіктің бастамашылдығымен құқық бұзушылықтардың, заң талаптарын орындамаулардың алдын алып, қала тұрғындарының қауіпсіздігін сақтау шаралары жыл басынан бері жоспарлы түрде жалғасып келеді. Мегаполистік құқық қорғаушылар қала тұрғындарының ештеңеге алаңдамай жайлы өмір сүруі үшін барлық жағдайларды жасауға тырысуда.
Қала көшелеріндегі автомобиль көлігінің апатын, жаяу жүргіншілермен соқтығысын болдырмау мақсатында патрульдік полиция полкінің қызметкерлері түрлі профилактикалық іс-шаралар, рейдтер өткізіп отырады. Жыл басынан бері тұрақты жүргізіліп келе жатқан іс-шараның бірі – автокөліктердің жол қозғалысы ережелеріне сай болуына байланысты.
Шымкент қаласы Полиция департаментінің ЖПҚБ Патрульдік полиция полкінің қызметкерлері терезелердің жарық өткізу нормаларынан асып түсетін көлік құралдарын пайдалану жайттарын анықтау және жолын кесуге бағытталған жұмыстарды тұрақты жүргізіп отырады.
Осы ретте ағымдағы жыл басынан жол қозғалысы ережесін сақтамай, терезесін күңгірттеп алған 12950 жүргізушіге қатысты ҚР ӘҚБтК-нің 590-бабымен (күңгірттеу) әкімшілік хаттама толтырылып, түсіндірме жұмыстары жүргізілді.
Құрметті жүргізушілер және жол қозғалысының қатысушылары!
Тәртіп сақшылары жүргізушілер арасында кең таралған жол қозғалысы ережесін бұзудың бір түрі автокөліктің терезесін күңгірттеу екенін айта өтіп, жол қозғалысының барша қатысушыларын жол қауіпсіздігін сақтауға шақырады.