Қай кезде де қоғамда алаяқтық жолмен аңқау адамдарды алдап кетушілер табылады. Қазіргідей пандемиялық ахуал жағдайында да ондай алаяқтар тиылмай отыр. Сондықтан Шымкент қалалық полиция Департаментінің қызметкерлері қырағылығын күшейте түсіп, халықтың талап-тілегі мен арыздарын жедел әрі нәтижелі орындау бойынша жұмыс жасауда.
Әл-Фараби АПБ-ның «102» нөміріне Шымкент қаласының тұрғыны арызданды. Ол өз арызында, белгісіз тұлға сеніміне кіріп, мемлекет тарапынан «атаулы әлеуметтік көмек» алып беремін деп, 150.000 теңге ақшасын алаяқтық жолмен иемденіп кеткенін көрсеткен.
Әл-Фараби АПБ Криминалдық полиция бөлімі қызметкерлерінің жедел-іздестіру іс шараларын жүргізу барысында жергілікті жердің тұрғыны анықталып, жеткізілді. Ұсталған азаматтың басқа да қылмыстарға қатыстылығы анықталуда. Тексеру амалдары жүргізілуде.
Осыған ұқсас жағдай қаланың тағы бір ауданында орын алған. Қаратау АПБ-ның «102» нөміріне Шымкент қаласының тұрғыны арызданды. Ол да өз арызында, белгісіз тұлға мемлекет тарапынан берілетін мүгедек балаларға арналған жәрдемақының құжаттарын рәсімдеп беремін деп сеніміне кіріп, 35.000 теңге ақшасын алаяқтық жолмен иемденіп кеткенін жазып, өқөыө қорғаушылардан көмектесуін өтінген.
Қаратау АПБ Криминалдық полиция бөлімінің қызметкерлері арызға байланысты жедел-іздестіру іс-шараларын жүргізу барысында жергілікті жердің тұрғыны анықталып, тиісті орынға жеткізілді. Құқық қорғаушылар бұл азаматтың да басқа қылмыстарға қатысы бар-жоғын анықтауда.