Жаңабазар ауылдық округіндегі «Жаңабазар ардагерлері» қоғамдық бірлестігінің мүшелері Шанақ ауылдық округінің тұрғындарымен кездесті. Жиында Мемлекет басшысы Қ.Тоқаевтың 2022 жылғы 2 ақпандағы №802 Жарлығымен Сыбайлас жемқорлыққа қарсы саясаттың 2022-2026 жылдарға арналған тұжырымдамасы және сыбайлас жемқорлыққа қарсы іс-қимыл туралы мәселелер талқыланды.
Жиында «Жаңабазар ардагерлері» қоғамдық бірлестігінің мүшесі Балтабай Жүнісов баяндама жасады.
«Сыбайлас жемқорлыққа қарсы іс-қимыл туралы» Заңда қызмет бабын теріс пайдалану, мемлекет мүлкіне қол сұғу, сыбайлас жемқорлыққа бой алдыру секілді қоғамның қалыпты дамуына кері әсер ететін, ел қауіпсіздігіне қауіп төндіретін жағдайларға басты назар аударылған.
Жемқорлықты түп-тамырымен қалай жоямыз? Қызметтік міндеттерін адал атқарған адам жемқорлыққа бармайды. Мұндай жандар адал іс-әрекетімен өзгелерге оң ықпал етеді. Әр азамат осылайша адал еңбек етсе, жемқорлықсыз қоғам қалыптастыратынымыз анық. Кейбір адамдар пара беруді мәселе шешудің оңай жолы деп біледі. Бұл дұрыс емес. Бүгінде пара алған да, пара берген де жазаланады. Сондықтан жемқорлықтан бойымызды аулақ салайық» деді баяндамашы.
Мұнан соң бірлестік мүшесі Әбдірақым Мәтәлиев, Шанақ ауылдық ардагерлер кеңесінің төрағасы Ерген Жорабаев, ауыл әкімі Серіғали Тілегенов, ауыл тұрғыны Ұлықбек Қанатбаев сөз алып, өзекті мәселелерге үн қосты. Тұрғындар тарапынан қойылған сұрақтарға жауап берілді.
Жаңабазарлықтар жемқорлыққа жол бермейміз деп тарқасты.
Ажар БЕРМҰХАНОВА, Қазығұрт ауданы.