Шардара ауданында дін саласындағы тұрақтылықты қамтамасыз ету мақсатында Шардара ауданы Жаушықұм ауыл округі «Қонар ата» мешітінің жамағатымен «Шетелде діни теологиялық білім алудың қаупі», — тақырыбында кездесуге аудандық ішкі саясат бөлімінің әдіскері, теолог маманы А.Данияров, Аудандық «Жастар ресурстық орталығы» КММ — нің теолог маманы Е.Сариев қатысты.
Аудандық ішкі саясат бөлімінің әдіскері, теолог маманы А.Данияров: Қазіргі жастардың шетелде білім алып, болашағына сеніммен қарап, отанына керекті маман боламын деген ұмтылыстары құптарлық іс. Өкінішке орай, Таяу Шығыс елдерінде соңғы жылдардағы әртүрлі діни ағымдардың белсенділігінің артуы мен дінаралық қақтығыстардың белең алуы, террористік ұйымдардың ашық әрекет етуі себебінен қоғамдық — саяси және діни ахуал күрделеніп кетті. Қазіргі уақытта қазақстандық жастардың белгілі бір бөлігінің арасында діни білім алу үшін шетелдік теологиялық рухани оқу орындарына түсу қажет деген пікір бар. Алайда, олардың көбі шетелде теологиялық білім алудың үлкен қаупі бар екенін ескере бермейді. Бұған қоса, қазіргі күнде әртүрлі жалған және деструктивті ағымдардың қызметі ашық жүргізіліп, олар басқа елден білім алу мақсатымен келген шетел азаматтары арқылы өз қатарын толықтыруды көздейді. Қазіргі таңда діни білім алуды армандаған жастарға оны отандық діни оқу орындарында алғаны маңызды. Студенттер сапалы діни білім алуда Қазақстанның да мүмкіндігі жоғары екенін білуі керек. Бүгінгі таңда Қазақстан мұсылмандары діни басқармасына қарасты жоғары білім беретін Нұр — Мүбарак Египет ислам мәдениеті университеті және арнаулы орта білім беретін 9 медресе — колледж жұмыс істейді деп сөзін қорытындылады.