Шымкент қаласында мүгедектігі бар азаматтарды әлеуметтік қолдау шаралары жыл сайын кеңейіп, жүйелі түрде жүзеге асырылуда.
Бүгінгі таңда қала бойынша 42 479 мүгедектігі бар азамат тіркелген. Оның ішінде, 8 275 адам 18 жасқа дейінгі мүгедек балалар.
Әлеуметтік қолдаудың жаңа форматы – әлеуметтік қызметтер порталы арқылы жүзеге асуда. Бұл жүйе арқылы мүгедектігі бар азаматтар қажетті құралдар мен қызметтерге электрондық цифрлық қолтаңбаны (ЭЦҚ) пайдаланып, өз бетінше тапсырыс бере алады. Жүйенің тиімді жұмыс істеуі үшін Шымкент қалалық жұмыспен қамту және әлеуметтік қорғау басқармасының ғимаратында өз-өзіне қызмет көрсету бұрышы ұйымдастырылған. Мұнда басқарма қызметкерлері азаматтарға тікелей көмек көрсетіп, кеңес береді.
2025 жылдың басынан бері қалада оңалтудың жеке бағдарламасына сәйкес 41 788 өтініш келіп түсіп, оның 72,2 пайызы немесе 30 167 өтініш қанағаттандырылды.
Әлеуметтік қызмет көрсету жүйесінің цифрландырылуы – азаматтардың қажеттіліктерін жедел әрі ыңғайлы түрде қанағаттандыруға жол ашуда. Бұл бастамалар қоғамдағы әділеттілік пен инклюзивтілікті нығайтудың нақты көрінісі болып отыр.