Мемлекет басшысы Қасым-Жомарт Тоқаев Республика күніне арналған салтанатты жиында еліміздің әлеуметтік-экономикалық даму бағыттарын айқындап, соңғы жылдардағы маңызды жетістіктерге тоқталды.
Президенттің айтуынша, Қазақстан ұлттық экономиканы түбегейлі жаңғырту үшін әртараптандыру саясатын табандылықпен жүзеге асырып келеді. Ел дамуының негізгі тіректерінің бірі – көлік және логистика саласы.
– «Қазақстан Еуразияның басты логистика орталығы, яғни хабы болуы керек. Оған еліміздің әлеуеті жетеді, мүмкіндігіміз де мол», – деді Мемлекет басшысы.
Осы мақсатта биыл «Достық – Мойынты» теміржолының екінші желісі пайдалануға берілді. Бұл – егемендік кезеңіндегі ең ірі теміржол құрылысы. Сонымен қатар 13 мың шақырым автокөлік жолы салылып, жөнделді. Әуе қатынасы саласында да айтарлықтай ілгерілеу бар: жыл басынан бері 36 жаңа халықаралық рейс ашылып, жүк тасымалы (карго) жүйесін дамыту бағытында нақты қадамдар жасалуда.
Өндіріс секторының өсімі 7,5 пайызға жетіп, шағын және орта бизнестің үлесі 40 пайызға жуықтады. Құрылыс қарқыны да артып, өткен жылы 19 миллион шаршы метр тұрғын үй салынды – бұл Тәуелсіздік жылдарындағы ең жоғары көрсеткіш.
Ауыл шаруашылығы саласы тұрақты даму үстінде. Соңғы жылдары жалпы өнім көлемі 2,5 есе артты.
– «Биыл да қамбамыз астыққа толды, 20 миллион тоннадан астам бидай жиналды», – деді Президент.
Қасым-Жомарт Тоқаев әлеуметтік саясаттың да ел болашағы үшін аса маңызды екенін атап өтті.
– «Қазақстан – Конституция бойынша әлеуметтік мемлекет. Сондықтан біз осы жауапты миссияны міндетті түрде орындаймыз. Әлеуметтік стратегиямыз тиімді әрі әділетті болуы керек», – деді Мемлекет басшысы.
Соңғы бес жылда білім беру саласына бөлінетін қаржы үш есе артқан. Ұстаздардың еңбекақысы екі есе көбейіп, қоғамдағы мәртебесі айтарлықтай көтерілді. Ел бойынша 1200 жаңа мектеп, соның ішінде «Келешек мектептері» ұлттық жобасы аясында заманауи білім ордалары ашылды.
Ғылымға да айрықша қолдау көрсетіліп отыр – соңғы бес жылда ғылымға бөлінген қаржы 5 есе өсті. Қазақстанда шетелдің 33 беделді жоғары оқу орнының филиалдары жұмыс істейді.
Мемлекет басшысы ұлт саулығын жақсарту бағытында да нақты нәтижелер бар екенін айтты. 2020 жылдан бері медицина саласына бөлінетін қаржы 3 есе артқан, 927 жаңа медициналық нысан пайдалануға берілді, ал елдегі орташа өмір сүру ұзақтығы 75 жастан асты.
Президент Қасым-Жомарт Тоқаев өз сөзінде еліміздің тәуелсіздігі мен тұрақтылығын сақтау, ұлттық бірлікті нығайту және ел әлеуетін арттыру жолындағы реформалардың табысты жүзеге асатынына сенім білдірді.
Республика күні – Тәуелсіздігіміздің бастауы мен мемлекетіміздің қуатын айшықтайтын мереке.
Еліміз өркендей берсін, Қазақстанның жарқын болашағы – бірлікте және еңбекте! 🇰🇿