Қазіргі таңда халықаралық қатынастар мен құқық саласындағы білікті мамандарға сұраныс артып келеді. Жаһандану үдерісі, мемлекетаралық байланыстардың кеңеюі және халықаралық ұйымдардың қызметінің белсенділігі халықаралық құқық мамандығының маңызын одан әрі күшейтуде. Осы бағыттағы кәсіби мүмкіндіктерді кеңінен таныстыру мақсатында М. Әуезов атындағы Оңтүстік Қазақстан университетінде «Халықаралық құқық мамандығы: мансаптық мүмкіндіктер» тақырыбында студенттер мен түлектердің кездесуі ұйымдастырылды.
Іс-шараны университеттің «Халықаралық қатынастар және халықаралық құқық» кафедрасы өткізді. Кездесудің негізгі мақсаты – студенттер мен түлектер арасындағы байланысты нығайту, кәсіби бағдар беру және халықаралық құқық саласындағы заманауи талаптар мен даму бағыттарын түсіндіру болды.
Кездесудің арнайы қонағы ретінде университеттің 2025 жылғы түлегі Қали Нұрайым Әлиқызы қатысты. Ол өз тәжірибесімен бөлісіп, оқу барысында жинақтаған білім мен дағдылардың кәсіби қызметте қаншалықты маңызды рөл атқаратыны туралы әңгімеледі. Сонымен қатар халықаралық құқық мамандығын меңгерген түлектер үшін мемлекеттік қызметте, халықаралық ұйымдарда, құқықтық консалтинг саласында және түрлі халықаралық жобаларда еңбек етуге кең мүмкіндіктер бар екенін атап өтті.
Басқосу барысында кафедраның профессорлық-оқытушылық құрамы да сөз сөйлеп, халықаралық құқық мамандығының ерекшеліктеріне тоқталды. PhD, доцент Е.Т. Бекбосынов пен аға оқытушылар И.Б. Бижанов, Г.М. Жайлауова, А.Б. Бекниязова және А.Б. Аширбекова студенттердің сапалы білім алуы мен кәсіби дамуы үшін университетте жасалып жатқан мүмкіндіктер туралы айтты.
Кездесу аясында халықаралық құқық саласының қазіргі таңда сұранысқа ие бағыттары, академиялық ұтқырлық бағдарламалары, шетелдік жоғары оқу орындарымен ынтымақтастық мүмкіндіктері және еңбек нарығындағы талаптар талқыланды. Студенттер өздерін қызықтырған сұрақтарын қойып, тәжірибелі мамандардан пайдалы кеңестер алды.
Мұндай кездесулер жастардың кәсіби бағдарын айқындауға, жоғары білімнің маңызын түсінуге және болашақ мансабын дұрыс жоспарлауға мүмкіндік береді. Сонымен қатар олар университет пен түлектер арасындағы байланысты нығайтып, тәжірибе алмасу мәдениетін қалыптастыруға ықпал етеді.
Бүгінде М. Әуезов атындағы Оңтүстік Қазақстан университеті халықаралық деңгейде бәсекеге қабілетті мамандар даярлау бағытындағы жұмыстарын жүйелі түрде жалғастырып келеді. Осындай іс-шаралар студенттердің білімін жетілдіруге, кәсіби әлеуетін арттыруға және халықаралық құқық саласында табысты маман болып қалыптасуына жол ашады.