Шымкент қаласында білім мен ғылым саласын дамытуға бағытталған бастамалар қарқын алып келеді. Соның бір дәлелі – EduCampShym оқу лагері аясында өткен кездесу барысында таныстырылған студенттердің инновациялық жобалары. Лагерь қатысушылары университеттің Физика-математика факультетінің ғылыми-білім беру мүмкіндіктерімен танысып, заманауи технологиялардың білім беру үдерісіндегі рөлі туралы жан-жақты ақпарат алды.
Кездесу барысында факультет деканының міндетін атқарушы Бақытғали Рахашев оқу орнының ғылыми әлеуеті мен заманауи инфрақұрылымы жөнінде баяндады. Сонымен қатар физика кафедрасының меңгерушісі Бекзат Әбдіқадыров, информатика кафедрасының меңгерушісі Лаура Сүлейменова және математика кафедрасының меңгерушісі Гүлжан Жетпісбаева факультет жетістіктері, ғылыми зерттеу бағыттары мен білім беру бағдарламалары туралы мәлімет берді.
Оқушылардың ерекше қызығушылығын тудырған жобалардың бірі – информатика кафедрасының студенттері Қарақат Ақбаева, Арыстанбай Әбілмансұр, Абибула Ерсұлтан және Равшанбек Асрор әзірлеген FeelFlow жасанды интеллект платформасы болды. Бұл жоба қазақ тіліндегі ымдау тілін үйретуге арналған және есту қабілеті бұзылған азаматтардың білім алу мүмкіндіктерін кеңейтуді көздейді.
Мамандардың айтуынша, елімізде 60 мыңнан астам есту қабілеті шектеулі адам бар. Соған қарамастан қазақ ымдау тілін қолдайтын заманауи цифрлық платформалар саны өте аз. Осы олқылықтың орнын толтыру мақсатында жасалған FeelFlow платформасы ерекше қажеттілігі бар азаматтарға жаңа білім алуға, қарым-қатынас дағдыларын жетілдіруге және ақпаратқа қолжетімділікті арттыруға мүмкіндік береді. Жоба жасанды интеллект технологияларының көмегімен пайдаланушыларға оқыту процесін жеңілдетіп, цифрлық мұғалім қызметін атқара алады.
Бұл бастама өңірлік жоғары оқу орындарында ғылым мен инновацияны дамытуға ерекше көңіл бөлініп отырғанын көрсетеді. Университет студенттерінің ғылыми ізденістері мен технологиялық шешімдері қоғамдағы өзекті мәселелерді шешуге бағытталған. Мұндай жобалар жастардың ғылыми-зерттеу қызметіне қызығушылығын арттырып қана қоймай, олардың шығармашылық және кәсіби әлеуетін дамытуға жол ашады.
Кездесу барысында оқушылар гуманоид роботтар мен виртуалды зертханалардың жұмысымен де танысып, заманауи ғылымның мүмкіндіктеріне куә болды. Университеттің ғылыми-инновациялық ортасы мен студенттердің жетістіктерін көрген лагерь қатысушылары болашақта осы оқу орнында білім алуға қызығушылық танытты.
Жас ғалымдар мен студенттердің бастамаларын қолдау, инновациялық жобаларды дамыту және ғылыми жетістіктерді кеңінен насихаттау – өңірдің білім мен ғылым саласындағы маңызды басымдықтарының бірі. FeelFlow жобасы осы бағыттағы табысты жұмыстардың жарқын үлгісі болып табылады.
