АБАЙ АУДАНЫНДА ЗАҢДЫЛЫҚТЫ ҚАМТАМАСЫЗ ЕТУ БАҒЫТЫНДА РЕЙДТІК ІС-ШАРАЛАР ӨТКІЗІЛДІ

«Заң мен Тәртіп» қағидатын іске асыру аясында Абай ауданының прокуратурасы уәкілетті мемлекеттік органдармен бірлесіп кальян өнімдерінің заңсыз айналымын анықтау және кәмелетке толмағандардың түнгі уақытта ойын-сауық орындарында заңды өкілдерінсіз жүру фактілерін анықтау мақсатында рейдтік іс-шара өткізді.
Рейд барысында аудан аумағындағы қоғамдық тамақтану және ойын-сауық мекемелерінің қызметі тексерілді. Тексеру кезінде кальян өнімдерін өткізуге қатысты заңнама талаптарының сақталуына, сондай-ақ кәмелетке толмағандардың құқықтары мен қауіпсіздігін қамтамасыз ету мәселелеріне ерекше назар аударылды.
Іс-шара қорытындысы бойынша заңнама талаптарының жекелеген бұзушылықтары анықталды. Анықталған фактілер бойынша прокурорлық ықпал ету шаралары қабылданып, кінәлі тұлғаларды заңнама талаптарына сәйкес жауапкершілікке тарту мәселесі қаралуда.
Абай ауданының прокуратурасы заңдылық пен құқықтық тәртіпті қамтамасыз ету, азаматтардың құқықтарын қорғау және жасөспірімдер арасындағы құқық бұзушылықтардың алдын алу бағытындағы жұмыстарды одан әрі жалғастырады.
Осыған байланысты кәсіпкерлік субъектілерін заң талаптарын қатаң сақтауға, ал ата-аналарды балаларының түнгі уақыттағы жүріс-тұрысына бақылауды күшейтуге шақырамыз.
Бұл бағыттағы қадамдар қоғамдық қауіпсіздікті нығайтудың және өскелең ұрпақтың құқықтық мәдениетін қалыптастырудың маңызды тетігі болып табылады. Түнгі уақыттағы рейдтік тексерулер тек жауапкершілікке тартуды ғана емес, сонымен бірге тұрғындар мен кәсіпкерлер арасында құқық бұзушылықтың алдын алу мақсатында түсіндірме жұмыстарын жүргізуді де көздейді. Мекеме иелерінің заң талаптарын сақтауы және жасөспірімдердің қауіпсіздігіне бей-жай қарамауы отбасылық құндылықтарды қорғауға және қала аумағындағы қылмыстық ахуалды төмендетуге тікелей септігін тигізеді.
Мемлекеттік органдар мен құқық қорғау құрылымдарының бірлескен іс-қимылы болашақта да жүйелі түрде ұйымдастырылып, әрбір анықталған заңсыздық бойынша тиісті шаралар қабылданатын болады. Жас ұрпақтың зиянды әдеттерден аулақ болуы мен олардың түнгі уақыттағы қауіпсіздігі заң орындарының тұрақты бақылауында қала береді. Құқықтық тәртіпті қамтамасыз етуде әрбір азаматтың белсенділігі мен жауапкершілігі маңызды рөл атқарады.