М. Әуезов атындағы Оңтүстік Қазақстан университетінде Басқарма Төрағасы – ректор м.у.а. Ғани Бесбаевтың төрағалығымен 2025–2026 оқу жылындағы қорытынды Ғылыми кеңесінің отырысы өтті.
Кеңес отырысының алдында білім мен ғылым саласында жетістіктерге жеткен университет қызметкерлері мен білім алушыларына төсбелгілері мен дипломдары, сонымен қатар «Zhas Galym – 2026» университетішілік ғылыми жобалар байқауының жеңімпаздарына 3 миллион теңге көлеміндегі ғылыми гранттары салтанатты түрде тапсырылды.
Күн тәртібіне сәйкес бірінші мәселе бойынша Студенттік мәселелер жөніндегі департамент директоры Төребек Е.Ж. 2025–2026 оқу жылындағы бакалавриат және магистратура білім алушыларының көктемгі емтихан сессиясының нәтижелеріне жан-жақты талдау жасап, оқыту сапасын арттыру жолдары туралы баяндады. Мұнда өткен оқу жылымен салыстырмалы талдау жасау негізінде, ЖМ/факультет білім алушыларының оқу жетістіктері сараланып, оқыту сапасын онан әрі арттыру мақсатындағы ұсыныстар берілді.
Стратегиялық даму департаментінің директоры Джунусбекова С.Ш. «2025- 2026 оқу жылының қорытындысы бойынша KPI-ға сәйкес ЖМ/факультеттер мен кафедралардың қызметін бағалау туралы» баяндамасында әрбір құрылымдық бөлімнің университеттің стратегиялық жоспарын жүзеге асырудағы негізгі сандық және сапалық көрсеткіштеріне жан-жақты талдау жасап, мұндағы тәуекелдер мен өзекті мәселелерге ерекше назар аударды.
Үшінші мәселе аясында комиссия төрағасы Айменов Ж.Т. Ғылыми кеңестің 2025-2026 оқу жылының екінші жартыжылдығында қабылданған шешімдерінің орындалуы туралы есеп берді. Мұнан соң Академиялық мәселелер және оқу үдерісінің сапасы жөніндегі департамент директоры Наукенова А.С. 2026–2027 оқу жылына арналған оқытушы -профессорлар құрамы педагогикалық жүктемесінің көлемі мен штаттық кестесін (1-курсты ескермегендегі) бекіту мәселесін талқыға салды.
Күн тәртібіндегі бесінші мәселе бойынша Қаржы департаменті директоры м.у.а. Байтохаева А.К. университеттің 2025 жылғы қаржы-шаруашылық қызметі туралы есебінде оқу орнының кірістері мен шығыстары туралы баяндады. «Auezov University Endowment Fund» эндаумент-қорының атқарушы директоры Мұхамедханова А.Б. университеттің эндаумент-қорының қызметін дамыту бағытында жүзеге асырылған жұмыстар мен алдағы жоспарлар туралы кеңінен баяндады.
Сонымен қатар Ғылыми кеңес отырысында университетОПҚ-ны «қауымдастырылған профессор (доцент)», «профессор» ғылыми атақтарына ұсыну, ОПҚ-ның монографияларын, оқулықтары мен оқу құралдарын баспадан шығаруға ұсыну, университет ОПҚ-ны мемлекеттік наградаға ұсыну, жаңадан құрылған диссертациялық кеңестің тұрақты құрамының міндеттерін бекіту, докторанттардың ғылыми кеңесшілерін қайта бекіту және т.с.с. маңызды мәселелер қарастырылды.
