Жетісай ауданында бұқаралық ақпарат құралдары қызметкерлерінің кәсіби мерекесіне орай салтанатты кездесу ұйымдастырылып, өңірдің ақпарат саласының дамуына үлес қосып жүрген журналистер мен сала ардагерлеріне құрмет көрсетілді. Мерекелік басқосу – ақпарат кеңістігінің айнасына айналған қалам иелерінің еңбегін бағалап, олардың қоғам алдындағы жауапкершілігін айшықтаған тағылымды шара болды.
Журналистермен өткен кездесуге Жетісай ауданының әкімі Серік Үсенұлы Мамытов қатысып, телеарна, мерзімді басылымдар, ақпараттық порталдар өкілдерін және сала ардагерлерін кәсіби мерекелерімен құттықтап, бүгінгі ақпарат дәуірінде журналистиканың орны бұрынғыдан да маңызды екенін атап өтті.
«Аудандық бұқаралық ақпарат құралдары әрдайым жоғары жауапкершілікпен және кәсіпқойлығымен ерекшеленіп келеді. Бүгінде Жетісайда бір телеарна, бес мерзімді басылым және көптеген ақпараттық порталдар заман талабына сай жұмыс істеп, жаңа медианы тиімді игеруде. Олар елдік мүддені қорғап, қоғамдағы тұрақтылық пен бірлікті нығайтуға, халық пен билік арасындағы сенімді байланысты қалыптастыруға сүбелі үлес қосып келеді. Осындай маңызды міндетті абыроймен атқарып жүрген барша журналистерге шынайы ризашылығымды білдіремін! Сіздерге зор денсаулық, отбасыларыңызға амандық, шығармашылық табыс пен толайым жетістіктер тілеймін!» деген аудан басшысы бұқаралық ақпарат құралдары өкілдерін алғыс хаттармен марапаттап, сый-құрмет көрсетті. Журналистер арасында өткен байқау жеңімпаздарына қаржылай ұтыстарын табыс етті.
Қоғамдағы өзекті мәселелерді көтеріп, елдің мұң-мұқтажын билікке жеткізетін, мемлекеттік саясаттың мәнін тұрғындарға түсіндіретін журналистердің еңбегі қай кезеңде де ерекше бағаланған. Әсіресе, цифрлық технологиялар қарқынды дамыған бүгінгі уақытта ақпараттың жеделдігімен қатар оның нақтылығы мен шынайылығы бұрынғыдан да үлкен жауапкершілік жүктейді. Осы тұрғыда Жетісай ауданындағы бұқаралық ақпарат құралдары кәсіби ұстанымынан айнымай, өңірдің тыныс-тіршілігін жан-жақты насихаттап келеді.
Аудандық мәслихат төрағасы Медет Қасымов пен аудандық полиция бөлімінің бастығы Мұрат Ермеков қатысқан кездесу тәжірибелі қаламгерлер мен жас буын журналистердің сабақтастықтығына, өңір журналистикасының болашағына деген сенімді нығайтып, кәсіби тәжірибе алмасуға мүмкіндік берді.
Мерекелік шара аудандық мәдениет үйі өнерпаздарының концерттік бағдарламасымен қорытындыланды. Көтеріңкі көңіл-күйге толы концерт қатысушыларға ерекше әсер сыйлап, мерекенің мәнін арттыра түсті.
