Шымкент қаласындағы М. Әуезов атындағы Оңтүстік Қазақстан зерттеу университеті талапкерлерге халықаралық стандарттағы білім алуға үлкен мүмкіндік ұсынып отыр. Университет базасындағы Honors College of Auezov University мен АҚШ-тың жетекші жоғары оқу орындарының бірі — Arizona State University (ASU) бірлескен қос дипломды бакалавриат бағдарламасына 50 білім гранты бөлінді.
Болашақ студенттер үшін цифрлық технологиялар мен IT саласы бойынша ең өзекті екі бағыт ұсынылып отыр:
- Ақпараттық технологиялар / Компьютерлік ғылымдар
- Бағдарламалық инженерия / Ақпараттық технологиялар
Аталған халықаралық жоба «3+1» форматы бойынша жүзеге асырылады. Бұл жүйе студенттерге бакалавриаттың 4 жылы ішінде бірдей екі диплом алып шығуға мүмкіндік береді. Оқу процесінің алғашқы үш жылы М. Әуезов атындағы ОҚЗУ базасында өтеді, ал соңғы төртінші оқу жылын студенттер онлайн форматта Arizona State University-де аяқтайды.
«Шетелдік озық университеттермен бірлескен қос дипломды бағдарламалар — өңірлік ЖОО-лардың бәсекеге қабілеттілігін арттыратын негізгі фактор. Талапкерлерге бөлінген 50 білім гранты еліміздің IT саласына халықаралық деңгейдегі жоғары білікті мамандарды даярлауға жол ашады», — деп атап өтті университет өкілдері.
Бағдарлама шартына сәйкес, ASU-дағы соңғы оқу жылына қабылдану және қос диплом бағдарламасына қатысу мүмкіндігі пәндер бойынша кредиттердің сәтті қайта есептелуіне және Arizona State University-дің ресми мақұлдауына байланысты. Түпкілікті шарттар студенттің академикалық үлгеріміне қарай белгіленеді.
Қазіргі таңда жасанды интеллект, бағдарламалық инженерия және үлкен деректерді өңдеу салалары әлемдік еңбек нарығында ең жоғары сұранысқа ие болып отыр. АҚШ-тың жетекші жоғары оқу орнымен біріккен бұл бағдарлама білім алушыларға заманауи IT-технологияларды терең меңгеріп қана қоймай, ағылшын тіліндегі кәсіби коммуникацияны дамытуға, халықаралық стартаптарға қатысуға және жаһандық компанияларда еңбек етуге кең мүмкіндік береді.
Айта кету керек, өңірлік университеттерде АҚШ-тың ТОП-жоғары оқу орындарымен бірігіп білім беру бағдарламаларын іске асыру — Шымкент қаласының білім беретін басты хаб ретіндегі рөлін нығайта түседі. Бұл отандық жастардың елден ұзамай-ақ әлемдік деңгейдегі дипломға ие болып, еңбек нарығында жоғары сұранысқа ие болуына кепілдік береді.
Байланыс ақпараты:
- 📱 WhatsApp: +7 747 275 75 00
- ☎️ Телефон: 8 7252 30 02 62
- 📍 Мекенжай: Шымкент қаласы, Тәуке хан даңғылы №5, В ғимараты, №122 кабинет (Кәсіптік бағдар беру орталығы).