Шымкент қаласындағы іргелі жоғары оқу орындарының бірі — Өзбекәлі Жәнібеков атындағы Оңтүстік Қазақстан педагогикалық университетінде 2026–2027 оқу жылына талапкерлерді қабылдау науқаны қарқынды түрде жүріп жатыр. Осы ретте Қазақстан Республикасы Ғылым және жоғары білім министрінің кеңесшісі Руслан Емелбаев университетке арнайы жұмыс сапарымен келіп, қабылдау комиссиясының ұйымдастырылу деңгейін, ашықтығы мен тиімділігін пысықтады.
Жұмыс сапары барысында министр кеңесшісіне білім ордасының қабылдау комиссиясының күнделікті тыныс-тіршілігі, талапкерлерден құжаттарды қабылдаудың кезең-кезеңімен жүзеге асу процесі және ақпараттық-консультациялық қызмет көрсету орталығының жұмысы егжей-тегжейлі таныстырылды. Заманауи білім беру стандартына сай, құжат қабылдау барысы толықтай электронды цифрлық жүйелер арқылы оңтайландырылған. Бұл талапкерлер мен олардың ата-аналары үшін ұзын-сонар кезекті болдырмай, әрбір өтініштің ашық әрі жедел өңделуіне толық мүмкіндік береді.
Кездесуде қабылдау науқанының әділдігі мен ашықтығын қамтамасыз ету бағытында атқарылып жатқан кешенді шараларға ерекше назар аударылды. Университет өкілдері жыл бойы өңірлерде жүргізілген кәсіби бағдар беру жұмыстарының оң нәтижелерімен бөлісті. Атап айтқанда, мектеп түлектеріне болашақ мамандықты дұрыс таңдау, педагогикалық бағыттың артықшылықтары мен мемлекет тарапынан берілетін жеңілдіктер туралы жан-жақты түсіндіру жұмыстары тұрақты жүргізілген.
Сонымен бірге, кездесу аясында талапкерлерді әлеуметтік қолдау шаралары кеңінен сөз болды. Университетке құжат тапсыруға келген ауылдық жерлерден келген жастарға, халықтың әлеуметтік осал топтарына жататын талапкерлерге көрсетілетін көмек түрлері, жатақханамен қамту және жеңілдетілген шарттар бойынша кеңес беру тетіктері таныстырылды. Қабылдау комиссиясының қызметін одан әрі жетілдіруге бағытталған жаңа бастамалар мен сервистік қызметтер де министрлік өкілінің назарына ұсынылды.
Кездесу соңында Руслан Тохтарбекұлы Өзбекәлі Жәнібеков атындағы ОҚПУ қабылдау комиссиясының атқарып жатқан жүйелі жұмысына оң бағасын берді. Министр кеңесшісі қабылдау науқанын қолданыстағы нормативтік-құқықтық талаптарға толық сәйкес сапалы ұйымдастырудың, кез келген талапкер үшін тең мүмкіндіктер мен жайлы жағдай жасаудың стратегиялық маңыздылығын баса айтты.
Өңірлік педагогикалық ЖОО-да білім сапасын арттыру және қабылдау процесін заманауи талаптарға сай жүргізу мемлекеттік білім саясатының басты басымдықтарының бірі болып қала береді.