Шымкент қаласында жоғары білім сапасын арттыру, жастарға патриоттық тәрбие беру, мемлекеттік саясат пен ұлттық басымдықтарды білім беру үдерісіне белсенді интеграциялау бағытында кешенді жұмыстар атқарылуда. Өңірлік жоғары оқу орындарының ғылыми-академиялық инфрақұрылымын байыту, оқытушылар мен студенттерді сапалы әрі заманауи әдебиеттермен қамтамасыз ету – білім беру саласын дамытудың негізгі бағыттарының бірі болып табылады.
Осы орайда, Шымкенттегі педагогикалық кадрлар даярлайтын іргелі оқу орны – Өзбекәлі Жәнібеков атындағы Оңтүстік Қазақстан педагогикалық университетінің (ОҚПУ) ғылыми кітапханасы құнды басылыммен толықты. Университет қорына Қазақстан Республикасының Президенті Қасым-Жомарт Тоқаевтың 1994 жылдан бергі таңдаулы сөздері, қанатты ойлары мен сбелі тұжырымдары топтастырылған «Әділетті қоғамға – шыншыл сөз» атты жаңа кітап жинағы келіп түсті.
Жаңадан келіп түскен жинақтың негізгі мазмұны Мемлекет басшысының төрт онжылдыққа жуық уақыттағы мемлекеттік басқару, заң үстемдігін қамтамасыз ету, білім мен ғылымды реформалау, жастар саясаты және ұлттық құндылықтарды жаңғырту туралы терең ой-толғамдарынан тұрады. Бұл еңбек мемлекеттілік тарихын, қазіргі реформалардың мәнін және еліміздің болашақ даму бағдарын түсінуде таптырмас білім беру құралы болып табылады.
Кітап жинағы жүйеленген 21 тақырыптық бөлімнен құралған. Жинақта ел дамуының стратегиялық бағыттарымен қатар, қоғамда үлкен сұранысқа ие цифрландыру, экологиялық мәдениетті қалыптастыру және жалпыұлттық «Таза Қазақстан» сияқты маңызды бастамалар кеңінен қамтылған. Мұндай идеологиялық және тәрбиелік мәні бар материалдардың өңірлік университет кітапханасына түсуі студент жастардың саяси-құқықтық сауаттылығын арттыруға тікелей ықпал етеді.
Жоғары білім беру саласында білім мен тәрбиені қатар алып жүру – болашақ педагог мамандарды даярлаудың басты кепілі. Өзбекәлі Жәнібеков атындағы ОҚПУ кітапханасының жаңа әдебиеттермен толығуы өңірдегі ғылыми-ағартушылық ортаны нығайтуға, профессор-оқытушылар құрамы мен студенттердің ізденіс аясын кеңейтуге мүмкіндік береді.
Мемлекеттік қызметшілерге, ұстаздарға, болашақ педагогтерге, зерттеушілерге, студенттерге және ел тарихы мен саясатына қызығатын барша оқырмандарға арналған бұл құнды жинақты университет кітапханасынан оқуға болады. Өңірдегі білім беру мекемелерінің ақпараттық-библиографиялық қорын байыту – Шымкент қаласының ғылыми және білім беру әлеуетін арттыруға қосылған маңызды үлес.
