Мұхтар Әуезов атындағы Оңтүстік Қазақстан университетінде Қазақстан Республикасының Жоғары білім қызметкерлері күні мен Ұстаздар күніне орай кең көлемді салтанатты жиын өтті. Бұл мерекелік кездесу отандық білім беру жүйесі мен ғылымның өркендеуіне сүбелі үлес қосып жүрген профессор-оқытушылар құрамына көрсетілген зор құрмет пен шынайы алғыстың көрінісі ретінде өте жоғары деңгейде ұйымдастырылды.
Мерекелік кеш барысында көпжылдық адал еңбегі, ғылыми жетістіктері және өскелең жас ұрпақты сапалы тәрбиелеудегі қажырлы қызметі үшін бір топ ұстаз ел мақтауына ілініп, мемлекеттік және салалық жоғары марапаттарға ие болды. Атап айтқанда, университеттің үздік өкілдері ҚР Ғылым және жоғары білім министрлігінің Құрмет грамоталары мен Алғыс хаттарымен, Шымкент қаласы әкімінің Алғыс хаттарымен, сондай-ақ «Adilet» партиясының арнайы марапаттарымен марапатталды. Бұл құрметті марапаттар – педагогтердің білім беру мен ғылымды дамыту жолындағы еңбегіне берілген лайықты баға.
Бүгінгі таңда елдегі жетекші жоғары оқу орындарының бірі – Әуезов университетінде 1556 профессор-оқытушы аянбай еңбек етіп келеді. Олардың қатарында 72 ғылым докторы, 397 ғылым кандидаты және 162 PhD докторлары бар. Бұл көрсеткіштер жоғары оқу орнының қуатты ғылыми-педагогикалық әлеуетін айқын көрсетеді. 80 жылдан астам айтулы тарихы бар бұл қара шаңырақ осы уақыт ішінде 240 мыңнан астам жоғары білікті маман даярлап, еліміздің әлеуметтік-экономикалық өсіп-өркендеуіне өлшеусіз үлес қосты.
Атап өту керек, соңғы жылдары өңірлік жоғары оқу орындары арасындағы кооперацияны арттыру, ғылымды танымал ету және жас зерттеушілерге жағдай жасау бағытында ауқымды жұмыстар атқарылуда. Университет қабырғасында заманауи зертханалар ашылып, халықаралық ғылыми жобалар жүзеге асырылуда. Бұл бастамалар жас ғалымдардың өз әлеуетін толық ашуына және отандық ғылымның бәсекеге қабілеттілігін арттыруға тікелей жол ашады.
Сонымен қатар, студенттердің сапалы білім алуымен қатар, олардың қоғамдық өмірге белсене араласуына, ұлттық құндылықтар мен патриотизм рухында тәрбиеленуіне ұстаздар қауымы ерекше көңіл бөледі. Жыл сайын ұйымдастырылатын түрлі республикалық және халықаралық байқауларда университет студенттері мен магистранттарының топ жарып жүруі – осы тынымсыз еңбектің айғағы.
Мұғалім мен ғылым жолын қуған зерттеушінің еңбегі – ұлт болашағына салынған ең маңызды инвестиция. Сондықтан әрбір оқытушының кәсіби тұрғыдан өсуіне қолайлы жағдай жасау, жас мамандарға жан-жақты қолдау көрсету және жоғары білім сапасын үнемі арттыру – басты міндеттердің қатарында қала береді.
Университет оқытушыларын осынау айтулы кәсіби мерекемен шын жүректен құттықтай отырып, баршасына мықты денсаулық, отбасылық амандық және шығармашылық пен ғылыми ізденістерде зор табыстар тілейміз!