ЕКПЕ АЛУҒА ҮНДЕЙТІН АКЦИЯ ӨТТІ

ҚР Президенті Қасым-Жомарт Тоқаевтың биылғы жылға арнаған «Жаңа жағдайдағы Қазақстан: іс-қимыл кезеңі» атты Жолдауында былтыр басталған індеттің әлемдік дағдарыс тудырып, миллиондаған адамның өмірін жалмап жатқанын айта келіп, бұл сынақтан өтіп, азаматтарымыздың өмірін сақтап қалу үшін, дені сау адамдарымыздың арқасында экономикамызды дамыту үшін бір ғана жол – індетке қарсы вакцина ектіру жолы барын айтқан болатын.
Соған байланысты Шымкент қаласының басшылығы көптеген іс-шаралар арқылы шымқалалықтардың екпе алуына қол жеткізуде. «Мен қауіпсіздіктемін» деп аталатын акцияның өтуіне қалалық Жастар ресурстық орталығы және еріктілер атсалысты. Тұрғындарды екпе алуға үндеген шара мегаполистегі №1, № 3 және №6 емханаларда ұйымдастырылды.
Еріктілер емханаға екпе алуға келген тұрғындарға «Мен қауіпсіздіктемін» браслетін таратты.
-Қазір қаладағы эпидахуал күрделі. Мегаполистегі коронавирусты емдеу орталықтарында ауырып жатқан науқастар көп. Олардың көбісі дәрігердің кеңесін алмай, өз бетінше ем-шара қабылдағандар және вакцина алмаған пациенттер. Соның салдарынан адамдардың дерті ушығып, соңы қайғылы жағдайға ұшыруда. Сондықтан қауіпті індеттің алдын алып, ауырмаудың тиімді жолы — екпе алу екенін ұмытпайық,-дейді №1 қалалық емхананың терапевт дәрігері Балнұр Пазилова.
Айта кетейік, Шымкентте жалпы екпе алу науқаны басталғалы 394 484 адам вакцина салдырды. Оның 319 297-сі вакцинаның екі компонентін алған.