Шымкенттік полицейлер алаяқтарды құрықтады

Еліміздегі карантиндік шектеулер кезінде де азаматтарды алдап-сулап ақшаларын иемденіп кету сияқты алаяқтықтар тиылмай тұр. Шымкент қаласы полиция Департаментінің қызметкерлері пандемия жағдайында да өз жұмыстарына тыңғылықтылық танытып, азаматтардың құқықтарын қорғап, құқық бұзушылықтың алдын алуда нәтижелерге жетуде.
Қаратау ауданының Полиция басқармасына жергілікті тұрғын арызданған. Ол өз арызында, белгісіз екі әйел «үй құжаттарын заңдастырып береміз»-деп, 3000 АҚШ доллары және 205.000 теңге ақшасын алып, алдап кеткенін көрсеткен.
Аталған жайт бойынша, Қаратау АПБ криминалдық полиция бөлімі қызметкерлерімен жедел-іздестіру іс-шарасы жүргізілген. Нәтижесінде, алдап кеткен жергілікті тұрғындар анықталып, басқармаға жеткізілді.
Енді бір осындай оқиға барысында Мемлекеттік бағдарлама арқылы қайтарымсыз ақша алып беремін деп алдап кеткен алаяқ анықталды. 2021 жылдың 11-тамызында Әл-Фараби АПБ-ның «102» нөміріне Шымкент қаласының тұрғыны арызданған. Онда танысы мемлекеттік бағдарлама арқылы қайтарымсыз 5.000.000 теңге алып беремін деп, 175.000 теңге ақшасын иемденіп кеткенін көрсеткен.
Әл-Фараби АПБ қызметкерлерінің жедел-іздестіру іс шараларын жүргізу барысында жергілікті жердің тұрғыны анықталып, жеткізілді.  Ұсталған азаматтың басқа да қылмыстарға қатыстылығы анықталуда. Тексеру амалдары жүргізілуде.
Осы орайда, Шымкент қаласы Полиция департаментінің қызметкерлері қала тұрғындарына бөгде адамдарға сеніп, алданып қалмауға кеңес береді.