Күнделікті өмірімізде қала тұрғындарының арасында қоқысты тиісті орынға тастамай, көрінген жерге тастап кету, абаттандырылған аймақты бүлдіру, тағы басқа да тазалықты сақтамай тұрмыстық құқық бұзушылыққа бару оқиғалары орын алып отырады. Шымкент қаласының әкімі шымқалалықтарды тазалық мәдениетіне үйрету, өз үйінің айналасы мен ауласының таза болуына жанашырлық танытуға тәрбиелеу жұмыстарын жүргізу арқылы қаланың тазалығына қол жеткіземіз, деп айтқанындай әкімдік пен тазалыққа жауапты мекемелер қызметкерлері тұрғындарға тұрмыстық құқық бұзушылыққа бармай тазалықты сақтауды дағдыға айналдыруына қол жеткізу үшін тынымсыз түрлі іс-шаралар жүргізуде. Қала тұрғындарының табиғатты аялап, тазалыққа деген жауапкершілігін арттыру мақсатында Әл-Фараби ауданы аумағында қанатты сөздер жазылған арнайы тақтайшалар орнатылды. Әл-Фараби ауданының әкімі Рашид Мыңбаев, аудан әкімдігі мамандары және қала еріктілері бірлесе табиғатты қорғауға шақыратын тақтайшаларды саябақтар мен гүлзарларға, көпқабатты үй аулаларына орнатты.
— Басты мақсат — табиғат құндылықтарын сақтап, тұрғындарға қоршаған ортаға жанашырлық таныту керектігі туралы жақсы көзқарас қалыптастыру. Адамдар сонда ғана туған өңір табиғатын қорғауда белсенділік көрсетеді. Тазалықты әр азамат өзінен бастаса сүбелі нәтижеге қол жеткіземіз, — деді аудан әкімі аула тұрғындарына.
Аталған лозунгтар шымкенттіктердің өмір сүру сапасы мен денсаулығын жақсартуға септігін тигізеді деген үміттеміз.
Қаланың бет-бейнесі — тазалықта. Шаhар тұрғындарын қоршаған ортаны таза ұстауға, өз туған жерінің тазалығына үлес қосуға шақырамыз.