Шымкент қаласының «Оңтүстік» индустриалды аймағында “Эко Шина” ЖШС пайдаланылған автокөлік шиналарын қайта өңдеу өндірісін дамытуда. Жобаның негізгі мақсаты — қаланың экологиялық жағдайын жақсарту, ескі шиналардың рұқсатсыз төгілуі мәселесін шешу, зиянды шығарындылары жоқ, қалдықсыз технологияларды енгізу арқылы экологиялық қауіпсіздікті арттыру, шиналарды қайта өңдеу қуаттылығын жылына 6 мың тоннадан 10 мың тоннаға дейін жеткізу.
Қазіргі уақытта жеке инвесторлар өндіріс көлемін арттырып, жаңа бағыттарды іске қосып жатыр. Тұрмыстық қатты қалдықтарды өңдеу жөніндегі тапсырманы іске асыру аясында «Жасыл даму» АҚ тарапынан жаңа өндіріске қаржылай қолдау көрсетілді. Қаржыландыру қайтарымды негізде, жылдық сыйақы мөлшерлемесі 3%-дан аспайтын және 3 жылдан 15 жылға дейінгі мерзімге беріледі.
Кәсіпорынның жаңа бағытына АҚ тарапынан 500 млн теңге қаржы бөлініп отыр. Жобаның жалпы құны – 629,377 млн теңге. Бүгінгі таңда кәсіпорын қажетті жабдықтарды сатып алып, оларды іске қосу жұмыстарын жүргізуде.
ЖШС құрылтайшысы Бауыржан Айкенжеев пен «Жасыл даму» АҚ инвестициялық жобалар департаментінің директоры Серікбол Қалиакбаров өндірістің жаңа бағытының іске қосылуына қатысып, техникалық ашылуын өткізді.
-Берілген қаржыға сәйкес, заманауи қондырғылар алдық. Жаңа бағыттарды қосып жатырмыз. Қазіргі басты мақсат — жылдан жылға өндірісті кеңейту. Кәсіпорында 1 сағатта 4 тонна қалдық өңделуде. 50 адам жұмыспен қамтылған, — дейді ЖШС құрылтайшысы Бауыржан Айкенжеев,
Кәсіпорында құрылыс, абаттандыру және басқа салаларда қолданылатын резеңке үгіндісі өндірілуде. Осылайша, жоба экологиялық, экономикалық және әлеуметтік маңыздылықты ұштастырады — жаңа жұмыс орындарын ашып, қоршаған ортаға түсетін жүктемені азайтады және «жасыл экономиканың» дамуына елеулі үлес қосады.
«ЭКО Шина» ЖШС жобасы — мемлекет пен бизнестің тиімді әріптестігінің сәтті үлгісі. Жобаның жүзеге асырылуы өңірдің экологиялық жағдайын едәуір жақсартуға, пайдаланылған шиналарды тиімді қайта өңдеуді қамтамасыз етуге және бүкіл ел бойынша болашақтағы «жасыл» өндірістердің негізін қалауға мүмкіндік береді.