М.Әуезов атындағы Оңтүстік Қазақстан зерттеу университетінде Халықаралық экологтар күніне арналған тағылымды іс-шара ұйымдастырылды. «Химиялық инженерия және биотехнология» жоғары мектебіне қарасты «Экология» кафедрасының ұйымдастыруымен «Түркістан өңірінің экологиялық жағдайын бағалау және жасыл технологияларды енгізу арқылы тұрақты дамуын қамтамасыз ету» тақырыбында дөңгелек үстел өтті.
Іс-шараға кафедраның профессор-оқытушылар құрамы, жас ғалымдар, магистранттар, докторанттар мен студенттер белсенді қатысты. Басқосу экология саласындағы өзекті мәселелерді талқылауға, ғылыми тәжірибе алмасуға және қоршаған ортаны қорғау бағытындағы бастамаларды насихаттауға арналды.
Мерекелік жиынға экология саласында табысты еңбек етіп жүрген кафедраның әр жылдардағы түлектері арнайы қатысып, құттықтауларын жеткізді. Олар өздерінің кәсіби тәжірибелерімен бөлісіп, табиғатты қорғау саласындағы жетістіктері мен кездескен қиындықтары туралы әңгімеледі. Сонымен қатар, қазіргі таңда экологиялық қауіпсіздікті қамтамасыз ету, табиғи ресурстарды тиімді пайдалану және қоршаған ортаны ластанудан қорғау мәселелері қоғам үшін аса маңызды екендігін атап өтті.
Дөңгелек үстел барысында Шымкент қаласы бойынша Экология департаментінің директоры Е. Қозыбаев, «Сырдария-Түркістан» мемлекеттік өңірлік табиғи паркінің Боралдай филиалының директоры Б. Қырықбаев, «Қазгидромет» РМК Шымкент қаласы бойынша инженер-химигі Е. Матегова, А. Асқаров атындағы Шымкент мемлекеттік дендрологиялық саябағының ғылыми қызметкері Б. Мәлік, сондай-ақ «Сырдария-Түркістан» мемлекеттік өңірлік табиғи паркінің Боралдай филиалының қызметкері Ғ. Назарбек мазмұнды баяндамалар жасап, өңірдегі экологиялық ахуал, биологиялық әртүрлілікті сақтау, атмосфералық ауа сапасын бақылау және ерекше қорғалатын табиғи аумақтардың маңызы туралы пікірлерімен бөлісті.
Сонымен қатар, кафедра ғалымдары экологиялық қауіпсіздік, қоршаған ортаны қорғау, қалдықтарды басқару, жасыл технологияларды өндіріске енгізу және тұрақты даму мәселелеріне арналған ғылыми баяндамаларын ұсынды. Қатысушылар ғылым мен өндіріс арасындағы байланысты күшейту және экологиялық білім беруді жетілдіру бағытында ұсыныстарын ортаға салды.
Жиын барысында «Amanat» партиясы Шымкент қалалық филиалы төрағасының міндетін атқарушы Ербол Байқонысов сала мамандарын кәсіби мерекемен құттықтап, қоршаған ортаны қорғау ісіне елеулі үлес қосқан бірқатар қызметкерлерді марапаттады.
Сондай-ақ «Экология» кафедрасының меңгерушісі, техника ғылымдарының кандидаты, доцент Асұлу Абдуованың көпжылдық еңбегі мен ғылымдағы жетістіктері жоғары бағаланып, оған Қазақстан Республикасы Экология және табиғи ресурстар министрлігінің «Экология саласының үздігі» төсбелгісі табысталды.
Аталған кездесу экологиялық мәдениетті нығайтуға, жас мамандардың кәсіби қызығушылығын арттыруға және сала өкілдері арасындағы ынтымақтастықты дамытуға зор үлес қосты. Мұндай іс-шаралар қоғамда табиғатқа жанашырлық көзқарасты қалыптастырып, қоршаған ортаны қорғау бағытындағы ортақ жауапкершілікті күшейтуге мүмкіндік береді.
