Өзбекәлі Жәнібеков атындағы ОҚПУ-да «Мансап апталығы: Job Ready Teacher» аясында ұйымдастырылған «Түлектің жұмысқа орналасу мектебі» Upgrade кәсіби курсының қорытынды жиыны өтті. Курс барысында бітіруші курс студенттері еңбек нарығында сұранысқа ие кәсіби дағдыларды меңгеріп, резюме дайындау, мотивациялық хат жазу, enbek.kz платформасымен жұмыс істеу, сұхбаттасу және мансаптық жоспарлау бағыттары бойынша тәжірибелік білім алды.
Курс әзірлеуші серіктестер Саттар Ерубаев атындағы №24 IT мектеп-лицейі, Зерделі мектебі және Қаратау ауданы бойынша Мансап орталығы болып табылады. Іс-шара барысында университет Басқарма Төрағасы – ректор м.а Әлібек Нұртаев құттықтау сөз сөйлеп, бүгінгі таңда сапалы біліммен қатар еңбек нарығында өз орнын таба алатын, кәсіби тұрғыдан дайын мамандарды қалыптастырудың маңыздылығын атап өтті. Сонымен қатар университет түлектерінің жұмыспен қамтылуын қолдау білім беру сапасының маңызды көрсеткіштерінің бірі екеніне тоқталды. Мансап орталығының басшысы Мәселбек Әділхан, университеттің Академиялық мәселелер жөніндегі проректоры Ж.Жылбаев болашақ мамандарды даярлаудағы серіктестіктердің тиімді тетігін айтып, алғыс білдірді.
Өз кезегінде Өнер және білім факультетінің бітіруші түлегі Асан Рабиға курс ұйымдастырушыларына алғыс білдіріп, болашақ жұмыс ордасына бейімделуге және жұмыс іздеу дағдыларын қалыптастыруға мүмкіндік болғанын жеткізді. Жиын соңында курсты сәтті аяқтаған білім алушыларға сертификаттар, ал бағдарлама әзірлеушілері мен серіктестерге алғыс хаттар табысталды.
Іс-шараның басты мақсаты – жоғары оқу орнын аяқтағалы отырған түлектердің еңбек нарығына сенімді қадам басуына қолдау көрсету, олардың кәсіби құзыреттерін жетілдіру және жұмысқа орналасу мүмкіндіктерін арттыру болды. Бағдарлама аясында ұйымдастырылған тәжірибелік сабақтар мен тренингтер студенттердің теориялық білімін тәжірибемен ұштастыруға мүмкіндік берді. Сонымен қатар қатысушылар жұмыс берушілердің талаптарымен танысып, заманауи еңбек нарығындағы өзгерістер мен жаңа мүмкіндіктер туралы жан-жақты ақпарат алды.
Курс барысында мамандар түлектерге жұмысқа орналасу кезінде жиі кездесетін мәселелерді шешу жолдарын түсіндіріп, өзін-өзі таныстыру, кәсіби қарым-қатынас орнату, сұхбат барысында сенімді жауап беру, уақытты тиімді басқару және мансаптық даму стратегиясын құру бағытында тәжірибелік кеңестер ұсынды. Мұндай кездесулер студенттердің өз мүмкіндіктерін дұрыс бағалап, болашақ кәсіби жолын нақты жоспарлауына оң ықпал етті.
Университетте өткізілетін мұндай жобалар білім алушылардың кәсіби даярлығын күшейтіп қана қоймай, жұмыс берушілермен өзара байланысты нығайтуға да мүмкіндік береді. Бұл өз кезегінде оқу орны мен әлеуметтік серіктестер арасындағы ынтымақтастықты дамытуға, түлектердің жұмыспен қамтылу көрсеткішін арттыруға және бәсекеге қабілетті жас мамандарды даярлауға бағытталған маңызды бастамалардың бірі болып саналады.
