М. Әуезов атындағы Оңтүстік Қазақстан университетінің жетекші өкілдері Қытай Халық Республикасының Үрімші қаласында өткен Қытай мен Орталық Азия елдерінің өндіріс, білім беру, ғылыми зерттеулер және практикалық қолдану салаларындағы ынтымақтастық конференциясына қатысты.
Конференция барысында Қытай мен Орталық Азия жоғары оқу орындары арасындағы ғылыми-зерттеу байланыстарын дамыту, бірлескен жобаларды іске асыру және академиялық әріптестікті кеңейту бағытында екі жақты келісім-шарт негізінде маңызды мәселелер талқыланды. Басқосу аясында білім беру жүйесін жетілдіру, инновациялық зерттеулерді қолдау, өндіріс орындары мен жоғары оқу орындарының өзара ықпалдастығын күшейту, сондай-ақ ғылым нәтижелерін өндіріске енгізудің тиімді тетіктері жан-жақты қарастырылды.
Конференцияға қатысушылар қазіргі заманғы жоғары білім беру жүйесіндегі өзекті мәселелерді талқылап, халықаралық ынтымақтастықты дамытудың жаңа бағыттарына ерекше назар аударды. Сонымен қатар, академиялық ұтқырлықты кеңейту, профессор-оқытушылар құрамы мен білім алушылардың тәжірибе алмасуын дамыту, бірлескен білім беру бағдарламаларын әзірлеу және ғылыми жарияланымдар санын арттыру мәселелері де күн тәртібінен орын алды.
Іс-шара барысында университет өкілдері Қытайдың жетекші жоғары оқу орындары мен ғылыми ұйымдарының басшыларымен кездесулер өткізіп, өзара ынтымақтастықтың келешегі туралы пікір алмасты. Тараптар ғылым, білім және инновация бағыттарында бірлескен жобаларды жүзеге асырудың маңыздылығын атап өтіп, тәжірибе алмасудың екі елдің жоғары білім жүйесіне оң ықпал ететінін жеткізді.
Бұл қадам М. Әуезов университетінің халықаралық ынтымақтастығын арттырып, білім беру мен ғылым саласындағы жаңа мүмкіндіктерге жол ашады. Сонымен қатар, мұндай халықаралық алаңдар университеттің ғылыми әлеуетін нығайтуға, шетелдік серіктестермен ұзақ мерзімді байланыстар орнатуға және халықаралық деңгейдегі ғылыми-зерттеу жобаларының санын көбейтуге ықпал етеді. Конференция қорытындысы бойынша қол жеткізілген келісімдер алдағы уақытта бірлескен ғылыми зерттеулерді жүзеге асыруға, инновациялық бастамаларды қолдауға және өндіріс, білім беру мен ғылым арасындағы байланысты жаңа деңгейге көтеруге негіз болады.
