Шымкент қаласындағы іргелі білім ордасы – Өзбекәлі Жәнібеков атындағы Оңтүстік Қазақстан педагогикалық университетінде жаңа 2026–2027 оқу жылына қабылдау науқаны қарқынды жүріп жатыр. Осы орайда, шығармашылық білім беру бағдарламалары бойынша оқуға түсуге өтініш білдірген талапкерлер үшін арнайы сыноқ емтихандары ресми түрде басталды.
Аталмыш білім ордасы жыл сайын өнер, спорт, бастапқы әскери дайындық және басқа да арнайы дағдыларды талап ететін мамандықтар бойынша жүздеген талантты жастарға есігін айқара ашады. Шығармашылық бағытты таңдаған абитуриенттер бекітілген ережелерге сәйкес екі кезеңнен тұратын арнайы емтихан тапсырып, өздерінің жеке қабілеттерін, кәсіби бейімділігін, теориялық дайындығын және орындаушылық шеберлігін сарапқа салуда.
Емтихан процесі Қазақстан Республикасы Ғылым және жоғары білім министрлігінің бекітілген талаптары мен нормативтік стандарттарына толық сәйкес жүргізілуде. Сондай-ақ, оқу орны басшылығы тарапынан сыноқтардың әділ, ашық және объективті өтуін қамтамасыз етуге ерекше көңіл бөлінген. Емтихан өтіп жатқан аудиториялар мен арнайы спорттық, өнер залы техникалық бақылау құралдарымен жабдықталып, талапкерлерге өз мүмкіндіктерін толық ашуға барлық қолайлы жағдайлар жасалған.
Талапкерлердің білімі мен өнерін сараптау үшін білікті оқытушылардан, ғылым кандидаттары мен өз саласының майталман мамандарынан құралған арнайы комиссия мүшелері жұмыс істеуде. Комиссия құрамы әрбір талапкердің шығармашылық әлеуетін жан-жақты зерделеп, әділ бағалауды жүзеге асыруда.
Айта кету керек, шығармашылық мамандықтарға даярланатын жас мамандарға бүгінгі таңда еңбек нарығында, әсіресе білім беру, мәдениет және спорт салаларында сұраныс өте жоғары. Сондықтан бұл емтихандар тек оқуға түсу сынағы ғана емес, сонымен бірге Шымкент өңірі мен оңтүстік аймақтың мәдени, педагогикалық және спортық әлеуетін арттыратын болашақ кәсіби кадрларды сапалы іріктеудің маңызды кезеңі болып табылады.
Жоғары білім ордасына түсуді армандаған жастар бұл сыннан мүдірмей өтіп, болашақ білікті педагог, өнерпаз немесе спорт шебері болуды мақсат етеді. Өзбекәлі Жәнібеков атындағы ОҚПУ өңірдегі жоғары білім беру мен ғылым саласын дамытуда, сондай-ақ бәсекеге қабілетті, жан-жақты дамыған жас мамандарды даярлауда бұл қабылдау науқанының маңызы зор екенін атап өтеді.
Университет ұжымы талапкерлерге сәттілік тілеп, болашақ студенттерді білім мен ғылымның қарашаңырағында асыға күтеді. Емтихандар бекітілген кестеге сәйкес өз жалғасын табуда.