Шымкент қаласындағы М. Әуезов атындағы Оңтүстік Қазақстан зерттеу университетінің жас ғалымы, «EcoGreenLab» ғылыми-зерттеу зертханасының меңгерушісі Еркебұлан Райымбеков жоғары ғылыми атаққа ие болды. Еліміздің ғылым саласын дамытуға елеулі үлес қосып жүрген PhD докторына «Химиялық инжиниринг» бағыты бойынша қауымдастырылған профессор (доцент) мәртебесі ресми түрде берілді.
Бұл туралы Қазақстан Республикасы Ғылым және жоғары білім министрлігі Ғылым және жоғары білім саласында сапаны қамтамасыз ету комитеті төрағасының 2026 жылғы 7 шілдедегі №528 бұйрығы шықты. Бұйрыққа сәйкес, философия докторы (PhD) Райымбеков Еркебұлан Батырбекұлына 20400 – «Химиялық инжиниринг» ғылыми бағыты бойынша «қауымдастырылған профессор (доцент)» ғылыми атағы бекітілді.
Еркебұлан Райымбеков басқаратын Ү. Бестереков атындағы «EcoGreenLab» ғылыми-зерттеу зертханасы — университеттің «жасыл» технологиялар, экологиялық қауіпсіздік және химиялық инжиниринг саласындағы озық ғылыми жобаларды жүзеге асыратын негізгі инновациялық орталықтарының бірі. Жас ғалымның жетекшілігімен зертхана ұжымы отандық өндіріс пен экологияны сақтауға бағытталған маңызды қолданбалы зерттеулерді орындап келеді.
«Өңірлік ғалымдардың еңбегі мемлекет тарапынан бағаланып, жоғары ғылыми атақтардың берілуі — Оңтүстік Қазақстан зерттеу университетінің ғылыми әлеуетінің артып келе жатқанының айқын дәлелі. Бұл жетістік жас зерттеушілерге үлкен серпін береді», — деп атап өтті ЖОО өкілдері.
Мемлекет басшысының отандық ғылымды дамыту және жас ғалымдарды қолдау жөніндегі тапсырмалары аясында өңірлік оқу ордасында заманауи зертханалардың жұмыс істеуі және онда жас мамандардың іргелі ғылыми нәтижелерге қол жеткізуі ерекше маңызға ие.
Айта кету керек, өңірде химиялық инжиниринг және экологиялық технологиялар бағыты бойынша осындай білікті кадрлардың қалыптасуы Шымкент қаласының өндірістік әлеуетін арттыруға тікелей ықпал етеді. Жас ғалымдарды мемлекеттік деңгейде тану мен олардың ғылыми әлеуетін ілгерілету — өңірлік жоғары оқу орындарының зерттеу орталығы ретіндегі бәсекеге қабілеттілігін жаңа белеске көтереді.
Жас ғалым Еркебұлан Батырбекұлын лайықты ғылыми атағымен құттықтаймыз! Отандық ғылымды өркендету жолындағы қажырлы еңбегіне толағай табыстар, жаңа ғылыми жаңалықтар мен шығармашылық заңғар биіктер тілейміз!