Шымкенттік полицейлер «Таза қала» профилактикалық іс-шарасы барысында қала аумағына күнделікті рейд жүргізуде. Мемлекет басшысы айтқандай «Таза қала» акциясы тазалыққа, тұрғындардың жауапкершілігін күшейтуге көмектеседі. Екінші жағынан тұрғындардың әкімдікпен бірге жасаған тазалық жұмыстарын бүлдіріп, көрінген жерге қоқыс тастап, бүлдіріп кететіндер де кездеседі. Сондай тұрмыстық құқық бұзушылықтардың алдын алып, құрықтау үшін мегаполисте тұрақты түрде профилактикалық іс-шара жүргізіліп келеді.
Шымкенттік полицейлер «Таза қала» жедел-профилактикалық іс-шарасы аясында 64 жүргізушіні жауапкершілікке тартты. Ағымдағы жылдың 7-тамызында Патрульдік полиция полкінің қызметкерлерімен рейдттік іс-шара жүргізілді. Нәтижесінде, 64 көлік жүргізушісіне қатысты ҚР ӘҚБтК-нің 630 бабы (жолдарды, темір жол өтпелерін және басқа жол құрылыстарын бүлдіру) бойынша әкімшілік хаттама толтырылды.
Әл-Фараби ауданы Полиция басқармасының учаскелік полиция инспекторлары жергілікті азаматтың Байтұрсынов көшесінің бойына құрылыс қалдықтарын тастағанын анықтаған. Абаттандыру қағидаларын бұзған тұрғынға ҚР ӘҚБтҚ-нің 505-бабына (Қалалар мен елдi мекендердiң аумақтарын абаттандыру қағидаларын бұзу, сондай-ақ қалалар мен елді мекендер инфрақұрылымы объектілерін бұзу, жасыл екпелерін жою және бүлдіру) сәйкес, әкімшілік хаттама толтырып, түсіндірме жұмыстарын жүргізді.
Сол сияқты Еңбекші АПБ ЖПҚБ учаскелік полиция инспекторларымен өткен іс-шара барысында Ақназархан көшесі бойына қала тұрғыны автокөлік доңғалақтарын шығарып қойғаны анықталды. Аталған азаматқа абаттандыру қағидаларын бұзғаны үшін ҚР ӘҚБтҚ-нің 505-бабына (Қалалар мен елдi мекендердiң аумақтарын абаттандыру қағидаларын бұзу, сондай-ақ қалалар мен елді мекендер инфрақұрылымы объектілерін бұзу, жасыл екпелерін жою және бүлдіру) сәйкес, әкімшілік хаттама толтырылып, түсіндірме жұмыстары жүргізілді.
Шымкент қаласы Полиция департаментінің қызметкерлері қала тұрғындары мен қонақтарына абаттандыру қағидаларын бұзған жағдайда, әкімшілік жауапкершілікке тартылатынын ескертеді.