Қала әкімі М.Әйтеновтің құқық қорғау органдарына қала тұрғындарының абаттандыруға кесірін тигізіп, құқық бұзуына жол бермеу, халыққа түсіндіру жұмыстарын жүргізу арқылы құқық бұзудың алдын алу туралы тапсырмасына сәйкес Шымкент қалалық полиция Департаментінің қызыметкерлері ұйымшылдықпен нәтижелі жұмыс жасауда.
Қала аумағындағы абаттандыру талаптарын сақтау мен оны бұзбау жағын бақылау, ең бастысы көрінген жерге қоқыс тастап ластау, немесе үйінің, мекеменің айналасында тазалық сақтамау сияқты өрескелдіктерді болдырмау мақсатында қала құқық қорғаушылары тынбай жұмыс жүргізіп келеді.
Қаладағы Абай ауданының полиция қызметкерлері профилактикалық іс-шаралар жүргізу барысында бір күн ішінде абаттандыру талаптарын бұзудың 27 оқиғасын анықтады. Құқық бұзушылыққа жол берген азаматтар ҚР Әкімшілік құқық бұзушылық кодексінің 505-ші статьясына сәйкес жауапкершілікке тартылды. Онда қала, елді мекендердің абаттандырылған территориясында тазалықты сақтамаған, инфраструктураны бүлдірген, жасыл желекті бүлдірген, тағы басқа абаттандыруға зияндық келтірген құқық бұзушылық үшін жауапкершілік қарастырылған.
Учаскелік полиция қызметкерлері өздеріне қарасты аумақтарда тұрақты түрде рейдттер жасап, жұртшылыққа үй айналасы, көше бойын, қоғамдық орындарды таза ұстау керектігін түсіндіріп отырады. Нәтижесінде тазалыққа, абаттандыруды құртуға байланысты құқық бұзушылық азая түсуде. Құқық қорғаушылар қала тұрғындарын әдеттегідей тәртіп пен құқық бұзбауға шақырады.