Жыл сайын 12 қазан күні елімізде Кадр қызметкерлері күні атап өтіледі. Осы айтулы мерекеге орай Өзбекәлі Жәнібеков атындағы Оңтүстік Қазақстан педагогикалық университетінің Адами ресурстарды дамыту департаментінің ұжымы мен қызметкерлері арнайы құттықталып, олардың оқу орнының дамуына қосқан айрықша үлесі жоғары бағаланды.
Бүгінгі таңда заманауи жоғары оқу орнының бәсекеге қабілеттілігі мен білім сапасы ең алдымен оның кадрлық әлеуетіне, білікті оқытушылар құрамы мен кәсіби мамандардың жинақталуына тікелей байланысты. Осы ретте университеттегі адами ресурстарды тиімді басқару, еңбек заңнамасының талаптарын қатаң сақтау, құжат айналымын жүйелеу және тарихи маңызы бар архив құжаттарының сенімді сақталуын қамтамасыз ету – Адами ресурстарды дамыту департаментіне жүктелген басты әрі жауапты міндеттердің бірі болып табылады.
Күнделікті көзге бірден көріне бермейтін, алайда үлкен мұқияттылықты, төзімділікті, жоғары жауапкершілік пен кәсіби біліктілікті талап ететін бұл еңбек – оқу орнының тұрақты, әрі үйлесімді жұмыс істеуінің берік негізі. Департамент қызметкерлері әрбір оқытушы мен қызметкердің еңбек жолын айқындаудан бастап, олардың кәсіби дамуына, құқықтарының қорғалуына және ұжымдағы жағымды психологиялық ахуалдың қалыптасуына үздіксіз ықпал етіп келеді.
Қазіргі таңда бұл маңызды құрылымда өз ісінің шеберлері саналатын 14 жоғары білікті маман еңбек етуде. Олардың әрқайсысы өз бағыты бойынша жүктелген тапсырмаларды мінсіз атқарып келеді. Атап айтқанда:
- Адами ресурстарды дамыту департаментінде – 6 маман;
- Құжаттамамен қамтамасыз ету бөлімінде – 6 маман;
- Университет архивінде – 2 білікті маман қызмет атқарады.
Аталған департаментті бірнеше жылдан бері өз ісінің білгірі, тәжірибелі әрі білікті басшы Айгүл Сейдуллақызы Мельдешова абыроймен басқарып келеді. Оның басшылығымен департамент ұжымы заманауи кадрлық саясатты сәтті жүзеге асырып, құжаттамалық үдерістерді цифрландыру және адами капиталды дамыту бағытында нәтижелі жұмыстарды атқаруда.
Құрметті кадр саласының мамандары!
Сіздерді кәсіби мерекелеріңізбен шын жүректен құттықтаймыз! Университет игілігі мен болашағы жолындағы қажырлы әрі жауапты еңбектеріңіз үшін терең алғысымызды білдіреміз.
Сіздерге зор денсаулық, отбасыларыңызға амандық пен береке, еңбектеріңізге толағай табыстар тілейміз! Кәсіби қызметтеріңізде әрдайым жаңа мүмкіндіктер мен биік белестер көп болсын. Атқарып жатқан әрбір игі істеріңіз әрдайым лайықты бағаланып, абыройларыңыз асқақтай берсін!
Кәсіби мерекелеріңіз құтты болсын!