Шардара ауданында дін саласындағы тұрақтылықты қамтамасыз ету мақсатында Шардара қаласына орналасқан Қ.Аманжолов жалпы орта мектебінің жоғарғы сынып оқушыларымен аудандық ішкі саясат бөлімінің ұйымдастыруымен «Жастар өміріне әлеуметтік желі қалай әсер етеді?», «Діни ағымдардың алдын алу» тақырыбындағы кездесуге Түркістан облысы дін істері басқармасы «Дін мәселелерін зерттеу орталығы» КММ — нің теолог маманы Д.Аманов, аудандық «Жастар ресурстық орталығы» КММ — нің теолог маманы Е.Сариев, Шардара қаласы әкімі аппаратының бас маманы Ж.Мүталиев қатысты.
Түркістан облысы дін істері басқармасы «Дін мәселелерін зерттеу орталығы» КММ — нің теолог маманы Д.Аманов: Жастардың діни сауаттылығы — қазіргі қоғамда күрделі әрі өзекті мәселелердің бірі. Ең алдымен экстремистік және террористік ұйымдар ғаламторды желі қолданушыларының әлі қалыптасып үлгермеген санасына ықпал ету үшін қолданады. Яғни, олардың негізгі нысанасы әлеуметтік жағдайы мен дүниеге деген көзқарасы толық қалыптаспаған топтар болып табылады. Діни сауаты таяз адамдардың діни ақпаратты ғаламтордан іздейтіндігі белгілі. Ал, мұндай адамның ақпарат тарату мәселесінде өте белсенді жұмыс жүргізетін радикалды ұйымдардың қармағына ілінуі әбден мүмкін. Адам діни сауаттылығын арттыру арқылы қоғамға, қоршаған ортаға деген көзқарасы қалыптасып, кемелдену құбылысы жүзеге асады. Жастардың рухани және діни сауатты болуы — кезек күттірмес мәселелердің бірі. Көп нәрсе білімсіздіктен туатыны даусыз. Жастарымыздың жат діни ағым жетегіне кетудің ең алғашқы, басты себебі — діни білімсіздіктен туындайды деп сөзін қорытындылады.
Аудандық «Жастар ресурстық орталығы» КММ — нің теолог маманы Е.Сариев: Еліміздің ертеңі, мемлекетіміздің жарқын болашағы білімді де білгір жастардың қолында. Қай заманда болмасын қоғамның қозғаушы күші — жастар. Әр адам өз болашағы үшін жауапты. Жастарымыздың жат діни ағым жетегіне кетудің ең алғашқы, басты себебі — діни білімсіздік. Қазіргі жастардың басым бөлігінің қоғам өміріне араласуы ғаламтор желісі арқылы жүзеге асады. Отбасында бала алғашқы адамгершілік дағдыларын үйренеді. Ата — ананың түсіндіруі, айтқан ақылы мен үлгі өнегесі, үйдегі өмір салты, отбасындағы ахуал балалар бойындағы мінез — құлық әдетін бағалау өлшемдерін қарастырады деп сөзін аяқтады.