Мемлекет басшысы Қасым-Жомарт Тоқаев бекіткен меритократия мен әділдік қағидаты бүгінде еліміздің жоғары білім жүйесінде, соның ішінде өңірлік ірі оқу ордасы Мұхтар Әуезов атындағы Оңтүстік Қазақстан зерттеу университетінде де өз жемісін бере бастады. Аталған оқу орнында кадрлық саясатты жаңарту және басқару жүйесінің тиімділігін арттыру мақсатында арнайы комиссияның шешімімен ұжым ішінде өзінің біліктілігі мен кәсіби шеберлігін дәлелдеген бірқатар азаматтар жауапты лауазымдарға тағайындалды. Сырттан немесе өзге саладағы мамандарды тартпай, ұйым ішінде ұзақ жылдар бойы еңбек етіп келе жатқан ішкі кадрлардың әлеуетін пайдалану көрсеткіші 83,3 пайыздан асып, ұжымның еңбекке деген ынтасы мен сенімін арттыра түсті.
Сатылай өсудің айқын мысалы ретінде, университеттің Өзбекстан Республикасындағы Шыршық филиалының директоры болып аталған қара шаңырақта 34 жылдық мол тәжірибесі бар, білім беру мен ғылыми-зерттеу бағыттарында өзін көрсете білген техника ғылымдарының кандидаты Мұрат Жарылқасынұлы Айтуреевтің бекітілуін айтуға болады. Сонымен қатар, ғылыми-педагогикалық салада көпжылдық тәжірибесі бар және 100-ден астам ғылыми еңбек пен оқулықтардың авторы, PhD докторы Назарбек Ұлжалғас Бақытқызы ғылыми және инновациялық қызмет жөніндегі проректордың орынбасары лауазымына тағайындалып, ғылыми жобаларды коммерцияландыру бағытындағы жаңа міндеттерді қолға алды.
Басқару жүйесіндегі құжат айналымы мен әкімшілік жұмыстардың сапасын арттыру мақсатында мемлекеттік қызметте 13 жылдан астам тәжірибесі бар және Executive MBA дәрежесінің иегері Нұрсұлтан Кенжебаев Ректор аппаратының басшысы болып тағайындалса, университеттің медиа саясаты мен ақпараттық-коммуникациялық бағытын жаңа деңгейге көтеру үшін теле-радиожурналистика мен баспасөз қызметінде 20 жылға жуық тәжірибе жинақтаған ҚР Журналистер одағының мүшесі Эльмира Жапарбекқызы Тұрлыбекова Медиа орталықтың басшысы қызметіне келді.
Сонымен қатар, оқу орнының академикалық мектептері мен факультеттерін дамыту мақсатында қара шаңырақтың өзінде түрлі жауапты қызметтерді атқарып, өзін ұйымдастырушылық қырынан танытқан PhD докторы Нұрлыбек Шырынбекұлы Отарбаев «Химиялық инженерия және биотехнология» жоғары мектебінің басшысы болып бекітілсе, 1991 жылдан бері осы салада үздіксіз еңбек етіп келе жатқан және 100-ден астам ғылыми-әдістемелік еңбектің авторы Сабит Абилдабеков «Спорт және туризм» факультетінің деканы қызметіне сайланды.
Басқару жүйесінің тыныс-тіршілігін іштен жақсы білетін маман-ғалымдардың жауапты қызметтерге келуі шешім қабылдау уақытын екі есеге қысқартып, университеттегі басқару тиімділігін 25-30 пайызға арттыруға мүмкіндік береді. Өз кезегінде бұл қадамдар өңірлік ірі ЖОО-ның халықаралық бәсекеге қабілеттілігін арттырып қана қоймай, елдегі білім мен ғылымды дамытуға, сондай-ақ мемлекеттік ақпараттық саясат пен меритократия қағидаттарының өмірде ашық әрі сапалы жүзеге асуына тікелей септігін тигізеді.
