Бүгін университетте «Қоғамды ізгілендірудегі Абай ілімі және жасанды интеллект» олимпиадасы басталды. Зияткерлік сайыстың алғашқы кезеңі университеттің Тест орталығында өтіп жатыр. Қатысушылар ұлттық құндылықтар, Қазақстан тарихы, мәдени мұра және азаматтық жауапкершілік тақырыптары бойынша білімдерін сынауда.
Барлығы 6 топтан 38 қатысушы білімін сынайтын олимпиаданың басты мақсаты – Абайдың «Толық адам» ілімін заманауи технологиялармен ұштастырып, білімді, рухани кемел әрі жауапты ұрпақ қалыптастыру. Олимпиада 4 негізгі кезеңнен тұрады. Бірінші кезең – «Ұлттық рух және құндылық» деп аталса, «Ұлттық ойындар — ұлттық рух» кезеңінде қазақтың ұлттық ойындары бойынша интеллектуалдық және физикалық жарыстар болмақ. Ал, «Абай және Толық адам», «Жасанды интеллект және болашақ» кезеңі жасанды интеллектінің мүмкіндіктерін меңгеріп, оны өмірдің түрлі салаларында қолдану және ұлттық ойын мазмұнымен практикалық тұрғыда ұштастырмақ.
Аталмыш зияткерлік сайыс студенттердің IT-дағдылары мен цифрлық сауаттылығын арттырып қана қоймай, ұлттық заманауи кодты сақтауға мүмкіндік береді. Жасанды интеллект алгоритмдерін гуманитарлық ғылымдармен және Абай мұрасымен байланыстыра зерттеу – отандық білім беру жүйесіндегі соны бастамалардың бірі болып табылады. Жастардың бұл бағыттағы ізденістері келешекте инновациялық жобалардың дүниеге келуіне негіз болады.
Олимпиада қорытындысы бойынша жеңімпаздар мен белсенді қатысушыларға арнайы дипломдар мен бағалы сыйлықтар табыс етіледі. Сондай-ақ, үздік нәтиже көрсеткен топтардың идеялары университеттің ғылыми-зерттеу орталықтарында ары қарай дамытылмақ. Мұндай сапалы әрі мазмұнды шаралар білім ошағында дәстүрлі түрде тұрақты түрде өткізіліп тұрады.