Өзбекәлі Жәнібеков атындағы Оңтүстік Қазақстан педагогикалық университетінде «Абай ілімі арқылы Қазақстан қоғамын ізгілендіру» атты жаңа ғылыми-ағартушылық жобаның салтанатты таныстырылымы өтті. Ауқымды бастама аясында Қазақстан Ғалымдар одағының президенті, ҚР Мемлекеттік сыйлығының иегері, академик Оразалы Сәбден ғалымдар мен жас зерттеушілерге арнайы ашық дәріс оқыды.
Салтанатты жиынды Стратегиялық даму және әлеуметтік істер жөніндегі проректор Баршагүл Исабек кіріспе сөзбен ашып, академик Оразалы Сәбденнің отандық ғылымды, мемлекеттілікті және қоғамдық сананы дамытуға қосқан еселі еңбегін таныстырды.
Аталмыш ғылыми-методологиялық жоба барлығы 45 дәрістен тұрады. Бастаманың негізгі мақсаты – ұлы Абайдың бай рухани мұрасын кеңінен насихаттау, оның адамгершілік, әділеттілік, білім мен ғылым туралы ілімдерін қазіргі жаһандану дәуіріндегі қоғам өмірімен сабақтастыра отырып, ізгілік құндылықтарын дәріптеу болып табылады.
Абай ілімі – ұлттың рухани жаңғыруына жол ашатын, адамды кемелдікке, қоғамды ізгілікке бастайтын маңызды бағдар. Осы тұрғыдан алғанда, дәрістер топтамасы жас ғалымдар мен студенттердің дүниетанымын кеңейтіп, ұлттық құндылықтарға деген құрметін арттыруға тікелей бағытталған. Дәріс барысында академик Оразалы Сәбден қазіргі әлемдегі рухани-этикалық мәселелерге тоқталып, былай деді:
«Әлемнің 66 елін араладым. Бүгінгі біз қайдан келдік, қай жолда тұрмыз, қайда барамыз? Қазір әлемге қарасаңыз, астаң-кестең. Рухани жұтаңданудан бізді құтқаратын — Абай мұрасы. Абайды тану – өзіңді тану, Абайды түсіну – адамдықтың биігіне ұмтылу».
Кездесу соңында академик осы бағыттағы ашық дәрістерді тек офлайн форматта ғана емес, еліміздің өзге де өңірлік оқу орындарының зерттеушілері үшін онлайн түрде де тұрақты өткізіп тұратынын жеткізді.
Ауқымды жоба аясында өңірлік ғалымдар мен магистранттарға арналған ғылыми-әдістемелік семинарлар жүйелі түрде ұйымдастырылады. Дайындалған дәрістер жинағы отандық педагогикалық білім беру жүйесін ізгілендіру мен студент жастардың рухани-адамгершілік әлеуетін көтеруде негізгі оқу-әдістемелік құрал ретінде пайдаланылатын болады. Кездесу барысында қатысушылар өздерін қызықтырған сұрақтарға тұжырымды жауаптар алып, қоғамдағы білім, ғылым және тәрбие сабақтастығы төңірегінде еркін пікір алысты. Рухани-ағартушылық бағыттағы мұндай сапалы бастамалар алдағы уақытта университет пен өңірлік білім ошақтарында өзінің дәстүрлі жалғасын табады.