Бүгін университет қабырғасында отандық телевизия саласының көрнекті өкілі, белгілі қоғам қайраткері, Қазақстан Республикасы Парламенті Сенатының VI–VII шақырылымдарының депутаты, «Құрмет» орденінің иегері Дана Нұржігітпен мазмұнды да тағылымды кездесу өтті. «Сөз және сана: журналистика мен ұстаздық миссия» тақырыбында ұйымдастырылған бұл салмақты жүздесуді университеттің Басқарма төрағасы – Ректоры Қайрат Балабиев арнайы жүргізіп отырды.
Жиынның беташары ретінде қатысушылар назарына Дана Нұржігіттің өмір жолы, кәсіби қалыптасу кезеңдері мен шығармашылық биіктерін жан-жақты қамтыған бейнеролик ұсынылды. Мазмұнды бейнебаян арқылы журналистің отандық теле-радио саласын дамытудағы елеулі еңбегі, белсенді қоғамдық қызметі және ел тарихындағы маңызды оқиғалар мен реформаларға араласқан тарихи сәттері өрнектелді.
Сапалы кездесудің ең маңызды әрі ерекше сәттерінің бірі – Дана Нұржігіттің авторлық «Көлеңке» атты жаңа кітабының ресми тұсаукесері болды. Белгілі тележурналист туындының жазылу тарихы, мазмұндық желісі мен көтерген негізгі түйткілді мәселелері жөнінде кеңінен ой бөлісіп, оқырман қауымға жеткізгісі келген басты идеяларына тоқталды. Автор адам баласының ішкі арпалысы, өмірлік сынақтар мен рухани беріктік жайында тереңнен толғанды.
Сонымен қатар, еркін жүздесуде қазіргі қоғамда өте өзекті болып отырған – сталкинг (адам артынан түсу, аңду, психологиялық қысым көрсету) тақырыбы жан-жақты сөз болды. Қатысушылар бұл жағымсыз құбылыстың адам психологиясы мен жеке қауіпсіздігіне тигізер зардабын, қарым-қатынас мәдениетіне әсерін қызу талқылады. Журналист бұл мәселенің әлеуметтік салдарына ерекше назар аударып, қоғамда жеке шекараны құрметтеу мен адам құқығын қорғаудың маңыздылығын баса айтты.
Ашық әрі еркін диалог форматында өрбіген жиында университет оқытушылары, жас ғалымдар мен студенттер көкейде жүрген сауалдарын қойып, толыққанды жауаптар алды. Сөз зергері Дана Нұржігіт журналистика саласындағы жауапкершілік, сөздің салмағы, кәсіби ар-ождан, азаматтық міндет пен ұстаздық миссияның өзара сабақтастығы туралы терең ой айтты.
Бұл тағылымды кездесу болашақ мамандар үшін кәсіби тәжірибе алмасудың, ой-көкжиегін кеңейтудің және сөз құдіретін түсінудің бірегей алаңына айналды. Шараны Республикалық Аналар алқасы өңірлік университетпен бірлесе отырып жоғары деңгейде ұйымдастырды.